युगदर्शन डटकम आज (७ असोज) बाट पाँच वर्ष पूरा गरी छैठौं वर्षमा प्रवेश गरेको छ । २०७६ साल असोज ७ गतेदेखि सञ्चालनमा आएको युगदर्शनले आफ्नो गौरवपूर्ण पाँच वर्ष पूरा गरेको हो ।
युगदर्शन प्रकाशन प्रालिबाट सञ्चालित युगदर्शन मिडिया यतिबेला साप्ताहिक पत्रिका, अनलाइनसँगै युटुब च्यानलबाट पाठक एवम् दर्शक –स्रोतामाझ पुगिरहेको छ ।
वि.स. २०६६ सालमा काठमाडौं जिल्ला प्रशासन कार्यालयमा दर्ता भएर त्रैमासिक बुलेटिनको रुपमा युगदर्शनको प्रकाशन सुरु भएको थियो । त्यसआधारमा युगदर्शन हाल विभिन्न स्वरुपमा १६ औँ वर्षमा सञ्चालन भइरहेको छ ।
यसरी त्रैमासिक बुलेटिनका रुपमा युगदर्शनको प्रकाशन १६ औँ वर्षमा प्रवेश गरेसँगै साप्ताहिक, अनलाइन र युट्युबको नियमित प्रकाशन भएको पाँचौँ वर्ष पूरा गरी छैटौँ वर्षमा प्रवेश गरेको छ ।
यो अवधिमा युगदर्शन जनपक्षीय पत्रिकाको रुपमा पाठकहरूले खोजी गर्ने पत्रिका बन्न पुगेको छ । यसले वैचारिक पत्रिकाको रुपमा समुन्नत समाज निर्माणको विचारलाई आत्मसात गर्दछ । त्यो सँगै राजनीतिक, आर्थिक, सामाजिक, वैदेशिकलगायतका समाचारलाई सत्य र सन्तुलित ढंगले पाठकमाझ पस्कने हाम्रो प्रयत्न रहँदै आएको छ ।
युगदर्शनले स्वदेशमा मात्र नभएर संसारभर छरिएका मजदुर, किसान एवम् गरिखाने वर्गको पक्षमा आफूलाई उभ्याउँदै आएको छ । प्रवासमा कष्टपूर्ण जीवन बिताइरहेका नेपालीको यथार्थ चित्रणसँगै संघर्ष र सफतालाई पनि युगदर्शनले पाठकमाझ पस्कँदै आएको छ ।
युगदर्शनले क्रान्तिकारी राजनीतिक विचारलाई आत्मसात गर्दछ । साथै, सत्य सन्तुलित लेख रचनालाई प्राथमिकता दिने गरेको छ भने गलत विचारको भण्डाफोर गर्दै आइरहेको छ ।
नाफामुलक व्यवसायिक सञ्चारमाध्यमले बजार पिटिरहेको अहिलेको अवस्थामा जनपक्षीय पत्रिकाको रक्षा महत्वपूर्ण दायित्व बन्न पुगेको छ ।
जनताका वास्तविक दुःख, सुख र संघर्षलाई स्थापित गर्न, सही वैचारिक राजनीतिलाई जनताको माझमा लैजान र नयाँ जनपक्षीय व्यवस्था स्थापनाका लागि जनतालाई प्रशिक्षित गर्न युगदर्शनको महत्त्वपूर्ण भूमिका रहने हामीले अपेक्षा गरेका छौँ ।
पाठकवर्गबाट पनि अहिलेसम्म पाएजस्तै नियमित सरसल्लाह, सहयोग, सुझाव एवम् आलोचनाको हामी अपेक्षा गर्दछौँ ।
छैठौं वर्ष प्रवेशको अवसरमा सम्पूर्ण पाठक, विज्ञापनदाता, लेखक एवम् समाचारदाता लगायत सम्पूर्ण शुभचिन्तकप्रति हार्दिक शुभकामना व्यक्त गर्दछौँ ।
