बागलुङ । राष्ट्रिय जनमोर्चा बागलुङले जिल्ला प्रशासन कार्यालय, बागलुङ मार्फत प्रधानमन्त्री तथा नेपाल सरकारको ध्यानाकर्षण गराउन २७ बुँदे ज्ञापनपत्र बुझाएको छ ।
जिल्ला अध्यक्ष तिलक थापा सहितको टोलीले प्रमुख जिल्ला अधिकारी नेत्रप्रसाद सुवेदीमार्फत सरकारलाई ज्ञापन पत्र बुझाएको हो ।
ज्ञापनपत्र बुझाउने कार्यक्रममा राजमो जिल्ला अध्यक्ष थापासहित गण्डकी प्रदेश उपाध्यक्ष धर्म बहादुर कुँवर, अखिल नेपाल महिला संघका केन्द्रीय उपाध्यक्ष लक्ष्मी बास्कोटा, राष्ट्रिय जनमोर्चा बागलुङका सचिवालय सदस्य लक्ष्मण पुन, थानेश्वर सुवेदी, जिल्ला सदस्य टीका संगम बिक, रिम बहादुर थापा, बोम बहादुर थापा, जिल्ला सल्लाहकार टेक बहादुर आरसी, नगर सदस्य तुलवीर श्रीस, पदम रायमाझी लगायत नेताहरू जिल्ला प्रशासन कार्यालय पुग्नुभएको थियो ।
ज्ञापनपत्र बुझे पछि प्रमुख जिल्ला अधिकारी सुवेदीले उक्त पत्र प्रधानमन्त्रीको कार्यालयसम्म पुराउने, जिल्ला प्रशासन कार्यालयको पहलमा हुने कार्यको कार्यान्वयनका तथा सहजिकरणका लागि आवश्यक पहल गर्ने प्रतिवद्धता राख्नु भएको थियो ।
राजमो बागलुङले राष्ट्रियता, जनतन्त्र, जनजीविकाको पक्षमा, संघीयताको खारेजी र विकास निर्माणमा भएका अनियमितता साथै ढिलासुस्तीको विरुद्ध बिहीबार (भदौ २७ गते) ज्ञापन पत्र बुझाएको हो ।
‘गणतन्त्र र राष्ट्रियताको रक्षा गरौं, संघीयताको खारेज गरौं’ भन्ने उद्घोष सहित राष्ट्रिय जनमोर्चा बागलुङले विशेष संगठनात्मक अभियान सञ्चालन गरिरहेको छ ।
