गोपालप्रसाद भट्टराई, सन्धिखर्क ।
अखिल नेपाल महिला सङ्घ अर्घाखाँचीले प्रगतिशील तिज कार्यक्रम सम्पन्न गरेको छ ।
तिजको अवसरमा शुभकामना आदानप्रदान नाचगान एवम् महिलाले सामूहिक रूपमा दरखाने र खुवाउने गरी २०८१ भदौ १८ गते मङ्गलबार सन्धिखर्कमा उक्त कार्यक्रम कार्यक्रम गरेको हो ।
कार्यक्रममा मन्तव्य राख्दै प्रमुख अतिथि महिला महासचिव शकुन्तला रानाले तिज पर्वलाई सामाजिक जागरणको रूपमा लिनुपर्ने बताउनुभयो ।
तिजको बहानामा भएका नकारात्मक पक्षलाई हटाउँदै सकारात्मक रूपमा अघि बढ्नुपर्नेमा उहाँको जोड छ ।
‘चाडपर्वलाई कम खर्चिलो बनाउनुपर्छ, भड्किलो बनाउनु हुँदैन’ महासचिव रानाले भन्नुभयो– ‘तिज गीतको माध्यमबाट आफ्ना अधिकार माग्ने र सामाजिक जागरण ल्याउने काम गर्नुपर्दछ ।’
राष्ट्रिय जनमोर्चाका लुम्बिनी प्रदेश सल्लाहकार शेरबहादुर बिसीले महिला सङ्घ अन्य राजनीतिक दलको महिला सङ्गठनभन्दा विचार र क्षमताले अब्वल रहेको दाबी गर्नुभयो ।
राजमो केन्द्रीय सदस्य तथा भूमिकास्थान नगरप्रमुख झबिलाल थापाले मुलुकमा प्राप्त उपलब्धि हासिल गर्न र परिवर्तनको आन्दोलनमा महिलाको योगदानबारे चर्चा गर्दै सचेत महिलाको अगुवाइ र योगदानका कारण आज महिलाहरूले स्वतन्त्र रूपमा तिज पर्व मनाउन पाएको बताउनुभयो ।
राजमो जिल्ला सहसचिव तथा सन्धिखर्क नगरपालिकाको कार्यपालिका सदस्य लीला भुसालले प्राप्त उपलब्धिको रक्षा, उपयोग र नेतृत्वमा पुग्नको लागि महिला एकता अपरिहार्य भएको बताउनुभएको छ ।
महिला सङ्घ जिल्ला कोषाध्यक्ष मीना भट्टराईको अध्यक्षता, सदस्य तुलसा कंवरको स्वागत मन्तव्य र सचिव कल्पना पोख्रेलको सञ्चालनमा सम्पन्न कार्यक्रममा राजमो अर्घाखाँचीका नेता, अगुवा महिला तथा कार्यकर्ताको उल्लेख्य सहभागिता रहेको थियो ।
