दिनेश रैदास, दाङ ।
दाङमा प्रगतिशील तिजमिलन तथा प्रशिक्षण भेला सम्पन्न भएको छ ।
अखिल नेपाल महिला सङ्घको आयोजनामा २०८१ भदौ ११ गते मंगलबार घोराहीमा उक्त कार्यक्रम सम्पन्न भएको हो ।
कार्यक्रममा प्रमुख अतिथि महिला सङ्घकी केन्द्रीय सदस्य तथा दाङ जिल्ला अध्यक्ष पूर्णिमा आचार्यले हुनुहुन्थ्यो ।
कार्यक्रमलाई सम्बोधन गर्दै तिज पर्व महिलासित सम्बन्धित चाड भएको भन्दै भड्किलो, विकृति र विसङ्गतिबाट जोगाउन सुझाव दिनुभयो ।
उहाँले सबै चार्डपर्वलाई सांस्कृतिक अनुशासन र आपसी सद्भाव कायम राख्दै मनाउनुपर्ने धारणा उहाँको थियो ।
त्यस्तै कार्यक्रमलाई सम्बोधन गर्दै राजमो केन्द्रीय सदस्य तथा दाङ जिल्ला अध्यक्ष गणेश आचार्यले अहिले तिज मनाउने नाममा आभूषण प्रदर्शनीको विकृति बढेकाले त्यसको अन्त्य हुनुपर्ने र यो पर्वलाई महिला अधिकार र समानताको पर्वको रूपमा मनाउनुपर्ने बताउनुभयो ।
कार्यक्रममा अखिल नेपाल जनजाति सम्मेलनका पूर्वकेन्द्रीय सदस्य रामबहादुर जिएम, अखिल नेपाल किसान महासङ्घ दाङका सचिव मनिराम खनाल, अखिल नेपाल शिक्षक सङ्घ दाङका सहसचिव उमाकला खनाल, जातीय समता समाज दाङका सहसचिव पोषण नेपाली र अखिल नेपाल प्रगतिशील लेखक सङ्घ लुम्बिनी प्रदेश समितिका उपाध्यक्ष सुरेश पाण्डेलगायतले मन्तव्य राख्नुभएको थियो ।
घोराही नगर अध्यक्षमा भट्टराई
भेलाले वसन्ता भट्टराईको अध्यक्षतामा १५ सदस्यीय घोराही नगर समिति गठन भएको छ ।
समितिको उपाध्यक्षमा सुशीला नेपाली, सचिवमा आशा किरण, सहसचिवमा गोमा पुनमगर र कोषाध्यक्षमा शारदा रावत चयन हुनुभएको छ ।
त्यस्तै, सदस्यमा चुमा खरेल, यमसरी घर्ती, पदमा थापा, सावित्रा घर्ती, मीना खत्री, लक्ष्मी पुन, विपना आचार्य, लक्ष्मी खनाल, पुष्पा बस्नेत र खिमा दमाई रहनुभएको छ ।
भेलाले हीरा खनाल, देवा पाण्डे, लुमा कालाथोकी, कमला गिरी र सीता खनाललाई सल्लाहकारमा चयन गरेको छ ।
कार्यक्रममा राजमो जिल्ला सदस्य मेघराज भट्टराई, अखिल (छैठौँ) दाङका सचिव दिनेश रैदास, रक्तिम सांस्कृतिक अभियानकी केन्द्रीय सल्लाहकार सुशीला पोख्रेललगायतको आतिथ्य रहेको थियो ।
महिला सङ्घ घोराही नगर समितिकी अध्यक्ष हीरा खनालको अध्यक्षतामा अघि बढेको सो कार्यक्रममा स्वागत मन्तव्य वसन्ता भट्टराईले र सञ्चालन कृष्णा रानाले गर्नुभएको थियो ।
