बैङ्कक । थाइल्याडको राजधानी बैङ्ककको दक्षिणपूर्वमा टर्बोप्रप इन्जिनबाट चल्ने एक विमान दुर्घटना भई जङ्गलमा खस्दा बेपत्ता भएका नौ जनाको मृत्यु भएको उद्धारकर्ताहरूले शुक्रबार जनाएका छन् ।
विमान बिहीबार चाचेओङ्साओ प्रान्तको जङ्गलमा खसी दुर्घटनाग्रस्त भएपछि जहाजमा रहेका सबै व्यक्तिको मृत्यु भएको अनुमान गरिएको थाई अधिकारीले जनाएका छन् ।
दुई पाइलट तथा सात जना यात्रुसहित नौ जना सवार जहाज बैङ्ककको सुवर्णभूमि विमानस्थलबाट थाइल्यान्डको खाडीस्थित ट्राट प्रान्ततर्फ जाँदै गर्दा दुर्घटना भएको स्रोतले जनाएको् छ ।
दुर्घटनापछि बेपत्ता व्यक्तिहरूलाई खोज्ने प्रयास गरिरहेको बताउँदै विमानमा सवार सबै जनाको मृत्यु भइसकेको चाचोङ्साओका गभर्नर चोन्लेटी याङट्रोङले घटनास्थलमा पत्रकारलाई जानकारी दिनुभयो ।
स्थानीय सञ्चारमाध्यमका अनुसार जहाजमा सवार यात्रुमा दुई बालबालिकासहित चार थाई र पाँच चिनियाँ नागरिक थिए ।
दुर्घटनाग्रस्त विमानको खोजी कार्यका लागि ३०० भन्दा बढी सैन्य कर्मचारी र स्वयम्सेवक तैनाथ गरिएको छ भने अधिकारीले दुर्घटनाको कारण पत्ता लगाउन अनुसन्धान सुरु गरिसकेका छन् ।
खोजीकर्ताले दुर्घटनामा परेका मानिसका शरीरका केही अङ्ग तथा विमानका टुक्रा फेला पारेको अधिकारीले बताएका छन् ।
अधिकारीका अनुसार भारी वर्षाका कारण खोजी कार्यमा बाधा पुगेको छ तर चोन्लेटीले बेपत्ता फेला नपारेसम्म खोजीकार्य नरोकिने उल्लेख गर्नुभयो । (रासस/एएफपी)
