इस्लामावाद । मध्यपाकिस्तानमा बिहीबार प्रहरीमाथि भएको रकेट आक्रमणमा मृत्यु हुनेको सङ्ख्या १२ पुगेको प्रहरीले शुक्रबार जनाएको छ ।
दक्षिणी सिन्ध र मध्य पञ्जाब प्रान्तका नदीकिनारमा दशकौँदेखि सङ्गठित आपराधी गिरोहले सो आक्रमण गरेको बताइएको हो ।
‘आक्रमणमा कम्तीमा बाह्र जना प्रहरी मारिएका छन् भने अन्य आठ जना घाइते भएका छन्ॅ प्रहरी प्रवक्ता सैफ अली वेन्सले बताउनुभयो ।
पन्जाब प्रान्तको रहिम यार खान जिल्ला हुँदै बिहीबार साँझ करिब २२ जना प्रहरी सवार दुईओटा प्रहरी गाडीहरू यात्रा गरिरहेका थिए जसमध्ये एउटा भ्यान बाढीमा फसेको हो ।
अपराधिक गिरोहले फसेका अधिकारीहरूलाई लक्षित गरी रकेट आक्रमण गरेको वेन्सले बताउनुभयो ।
आक्रमणको मुख्य अपराधी रातको कारबाहीमा मारिएको शुक्रबार प्रहरीले जारी गरेको एक विज्ञप्तिमा उल्लेख छ ।
‘अपराधीको पहिचान नभएसम्म अभियान जारी रहने छॅ विज्ञप्तिमा भनिएको छ ।
सेनाले सन् १९९० को दशकको सुरुमा सिन्धमा आपराधिक गिरोह विरुद्ध सशक्त कारबाही सुरु गरेको थियो तर त्यसपछिको सरकारले प्रान्तमा कानुन र व्यवस्था कायम गर्न असफल भएपछि उनीहरू फेरि सक्रिय भएका छन् ।
प्रधानमन्त्री शाहबाज सरिफले आक्रमणकारी विरुद्ध तत्काल र प्रभावकारी कारबाही गर्न आदेश दिनुभएको बताइएको छ । (रासस/एएफपी)
