पोखरा । कास्कीको सदरमुकाम पोखरामा अखिल नेपाल राष्ट्रिय स्वतन्त्र विद्यार्थी युनियन (छैठौं) को सोह्रौँ सम्मेलनपछिको दोस्रो भेला सम्पन्न भएको छ ।
“जनवादी शिक्षाप्राप्तिको लागि निरन्तर सङ्घर्ष गरौँ, बढ्दो युवाविद्यार्थीको विदेश पलायन रोकौँ” मूल नाराका साथ २०८१ भदौ १ गते शनिबार सो कार्यक्रम सम्पन्न भएको हो ।
सम्मेलनको उद्घाटन प्रमुख अतिथि रहनुभएका युनियनका केन्द्रीय उपाध्यक्ष गणेश अधिकारीले गर्नुभएको थियो ।
सो अवसरमा सम्बोधन गर्दै उहाँले वर्तमान राज्यको प्रमुख समस्याको रूपमा युवाविद्यार्थी पलायन रहेको बताउनुभयो ।
देशमा सही प्रकारको शासन व्यवस्था नभएकाले देश विकासमा युवा जनशक्तिलाई राज्यले खपत गर्न नसकेकाले युवाबिद्यार्थीहरूले विदेश पलायनको बाटो समात्नुपरेको उहाँको भनाइ थियो ।
नयाँ जनवादी व्यवस्थाले मात्र देश र जनताको समस्या समाधान गर्ने भएकाले युवाविद्यार्थीले त्यसको पक्षमा सङ्घर्ष गर्नुपर्ने आवश्यकतामा उहाँले जोड दिनुभयो ।
भेलालाई राष्ट्रिय जनमोर्चाका केन्द्रीय सदस्य शङ्कर बराल, मूल प्रवाह अखिल भारत नेपाली एकता समाजका केन्द्रीय उपाध्यक्ष कुलबहादुर थापा, अखिल नेपाल ट्रेड युनियन महासङ्घ (अन्टुक) का केन्द्रीय सदस्य नामबहादुर बाठामगर, अखिल नेपाल जनजाति सम्मेलनका गण्डकी प्रदेश अध्यक्ष डम्बर थापा, नेकपा (मसाल) का कास्की प्रवक्ता चन्द्रबहादुर केसी, राजमो कास्कीका अध्यक्ष रविमोहन ढकाल, जातीय समता समाजका जिल्ला अध्यक्ष प्रेमबहादुर विक, अखिल नेपाल युवक सङ्घका जिल्ला सचिव प्रकाश बराल र राजमो पोखरा नगर समितिका अध्यक्ष विष्णु पुरीले शुभकामना दिनुभएको थियो ।
अध्यक्षमा अधिकारी
भेलाले सोमनाथ अधिकारी अध्यक्ष रहनुभएको अखिल (छैठौं) को जिल्ला समिति गठन गरेको छ ।
समितिको उपाध्यक्षमा शिशिर सुवेदी, सचिवमा अमृत विक, सहसचिवमा सन्जिता घर्तीमगर र कोषाध्यक्षमा बिना ढुङ्गाना रहनुभएको छ ।
त्यस्तै, सदस्यहरूमा मिलन सुनुवार, विवेक अधिकारी, तारा भण्डारी, अस्मिता पुन, सङ्गम घर्तीमिरे विक, सुधा थापा र सुनमाया थापा रहनुभएको छ ।
समितिलाई अखिल नेपाल बुद्धिजीवी सङ्घ कास्कीका सचिव प्रवीण पौडेलले बधाई दिनुभएको थियो ।
भेलाको अध्यक्षता सोमनाथ अधिकारीले, सञ्चालन अमृत विकले र स्वागत बिना ढुङ्गानाले गर्नुभएको थियो ।
