काठमाडौं । बाराको सिम्रौनगढमा विषाक्त खानाका कारण एकै परिवारका तीनजना बालबालिकाको मृत्यु भएको छ ।
सिम्रौनगढ नगरपालिका– ७ झवानी टोल निवासी नरेश रामको परिवारले शनिबार साँझको खानामा माछा र भात खाएका थिए।
सँगै खाना खाएका परिवारका ६ जनामध्ये तीनजना बालबालिकाको मृत्यु भएको हो । बालबालिकको ‘फुड प्वइजन’को कारण मृत्यु भएको चिकित्सकले बताएका छन्।
घरमुली नरेश रोजगारीको लागि भारतको पञ्जाबमा बस्छन्। घरमा नरेशका आमा-बुवा, पत्नी र तीनजना छोराछोरी बस्दै आएका थिए।
शनिबार साँझ घर नजिकैको पोखरीबाट ल्याएको माछासँग भात खाएर सुतेका बालबालिका राति सिकिस्त बिरामी भएपछि अस्पताल लगिएको थियो । आइतबार र सोमबार उपचारको क्रममा उनीहरुको मृत्यु भएको प्रहरीले जनाएको छ ।
मृत्यु हुनेमा ९ वर्षीया लालिमा राम, ७ वर्षीया पुष्पा राम र ५ वर्षीय छोरा कृष्णनन्दन राम छन्। उनीहरुको कलैया र वीरगञ्जका अस्पतालमा मृत्यु भएको प्रहरीले जनाएको छ।
आफ्ना सबै छोराछोरीको मृत्युपछि आमा विछिप्त अवस्थामा छिन्।
आफ्ना सबै छोराछोरीको मृत्यु भएको खबर पाएपछि नरेश राम भारतको पन्जाबबाट सोमबार घर आइपुगेका छन्। पोष्टमार्टमपछि उनले आफ्ना तीन छोराछोरीकै शव अस्पतालबाट बुझेर लगेका प्रहरीले जनाएको छ।
बालबालिकासँगै बसेर उही खाना खाने तीन जना वयस्कलाई भने केही नभएपछि प्रहरीले घटनालाई रहस्यमय मान्दै अनुसन्धान अघि बढाएको छ।
परिवारका सबै सदस्यले माछासहितको खाना खाए पनि अभिभावक भने बिरामी नपरपछि प्रहरीले घटनालाई रहस्यम मानेको हो।
