विष्णु शर्मा ##
गाउनुहोला सबैले एउटा गीत लेखेँ है
भन्छु मैले हाम्रो देशमा के के देखेँ है ।
हाम्रो देशमा सरकार छ महिना टिक्दैन
ठुला दल सत्ता विना बस्न सक्दैन ।
देशको काम गर्ने होइनन् सरकारमा बसेर
भ्रष्टाचारमा तल्लीन हुन्छन् कम्मर कसेर ।
स्वार्थको आधारमा सरकारहरू फेर्दछन्
विदेशीले जैलेसुकै सीमा घेर्दछन् ।
सत्ता समीकरण हुन्छ गल्तीहरू लुकाउन
दिँदैनन् भ्रटाचारका फाइल फुकाउन ।
एउटा भ्रष्ट गएर अर्का भ्रष्ट आ’का छन्
पालैपालो मिलीजुली खान पा’का छन् ।
बौद्धिक युवायुवती विदेशलाई पेवा भो
अझै भन्छन् राजनीति समाजसेवा हो ।
देश मात्र पछि छैन युवा विदेश गएर
बाबाआमा बिरामी छन् एक्लै भएर ।
बिदेशीका दलाल रै’छन् देशका नया पार्टी नि
उनैसँग मिलाउँछन् चुचाघाटी नि ।
स्वीकार गर्नुपर्दछ रे भारतको प्रभुत्व
लिलाम गर्न खोजेका छन् देशको अस्तित्व ।
विदेशलाई बुझाउने रहेछ यिनको योजना
सफल हुन दिनुहुन्न यस्ता सपना ।
दुईचार दिनलाई काम गर्न हामी विदेश आएको
देशभक्ति मूल प्रवाहसँग पाएको ।
लाहुरे मात्र बनी हामी छैनौँ विदेश बसेका
कमजोर हुन्नन् बाध्यताले विदेश पसेका ।
खाँचो हाम्रो परेमा फर्की हामी आउने छौँ
कस्तो हुन्छ देशको माया थाहा पाउने छौ ।
देशले गति पाउँदैन भाषणको भाकाले
जनता लाटा भए देश खान्छन् डाकाले ।
भ्रष्ट र दलाललाई अब जालमा पार्नी हो
जागौँ नारी हाम्ले यिनका सेखी झार्नी हो ।
