काठमाडौँ । राष्ट्रिय सहकारी बोर्डकी कर्मचारी कान्ति पाण्डेले समाचार सङ्कलनका क्रममा पत्रकारमाथि दुर्व्यवहार गर्नुका साथै सञ्चार सामग्रीसमेत खोसेको भन्दै नेपाल पत्रकार महासङ्घले आपत्ति जनाएको छ ।
महासङ्घ महोत्तरी शाखाका अनुसार साउन १५ गते राजधानी टुडे अनलाइनमा कार्यरत महोत्तरीका पत्रकार राजेश सिंहलाई समाचार सङ्कलनका क्रममा उनले पाण्डेले दुर्व्यवहार गरेकी हुन् ।
स्थानीयको अनुरोधमा गाई गौशालामा भएको बेथितिको बारेमा समाचार सङ्कलनका लागि पत्रकार सिंह महोत्तरीको निगौल गाई गौशाला कार्यालय पुगेका थिए । सोही क्रममा पत्रकार सिंहलाई कार्यालयको सभाकक्षभित्रै पाण्डेले भिडिओ किन खिचेको भन्दै मोबाइल खोसेर गालीगलौज गर्दै दुर्व्यवहार गर्नुका साथै घटनास्थलमा रहेका प्रहरीले समेत पत्रकार सिंहलाई हप्काएको शाखाले जनाएको छ ।
‘नागरिकलाई सुसूचित गराउने कर्ममा जुटेका पत्रकारमाथि यस किसिमका व्यवहार हुनु अत्यन्त निन्दनीय र प्रेस स्वतन्त्रताविरोधी हर्कत हो’ पत्रकार महासङ्घले बिहीबार विज्ञप्ति प्रकाशित गरी भनेको छ– ‘महासङ्घ प्रेसविरोधी घटनाको छानबिन गरी दोषीमाथि कानुनी कारबाहीका लागि सम्बन्धित निकायसँग माग गर्दछ ।’
