काठमाडौं । गएको असार २८ गते चितवनको सिमलतालमा पहिरोमा परी त्रिशूलीमा बेपत्ता दुईवटा बस र हराएका यात्रुको खोजीका लागि नेपाल आएको भारतीय टोली फर्किएको छ ।
पानीमा खोजीका लागि प्रयोग हुने सोनर क्यामेरा, चुम्बकसहितका उपकरण लिएर आएको चार जना गोताखोर र प्राविधिक समेतको १२ जनाको टोली आइतवार स्वदेश फर्किएको हो ।
नेपालको अनुरोधमा आएको भारतीय प्राविधिक टोली साउन ६ गतेबाट एक सातासम्म नेपालका सुरक्षा निकायहरूसँग मिलेर खोजीमा खटिएको थियो।
नेपालबाट बिदा हुनुअघि भारतीय टोलीले त्रिशूली नदीमा पानीको वेग आफूहरूले सोचेको भन्दा धेरै भएका कारण उपलब्धि हासिल गर्न नसकेको बताए ।
उच्च वेग सहितको धमिलो पानी भएका कारण आफूहरूसँग भएका उपकरणले नतिजा नदिएको प्रतिक्रिया दिएको चितवनका सहायक प्रमुख जिल्ला अधिकारी खिमानन्द भूसालले बताए ।
‘उहाँहरूले जाने बेलामा त्रिशूलीको पानीको वेग र धमीलोपन सोचेभन्दा पनि धेरै रहेछ, हाम्रो लागि पनि राम्रो सिकाइ र नयाँ अनुभव भयो भन्ने कुरा गर्नुभयो,’ भारतीय टोलीलाई बिदाइ गरेपछि भूसालले भने ।
भारतको ‘नेसनल डिजास्टर रेस्पोन्स फोर्स’का विशेषज्ञहरूले एक सातासम्म गरेको खोजीबाट पनि बस र थप बेपत्ताहरू पत्ता लाग्न नसकेका हुन् ।
हालसम्म दुर्घटनामा परेका २५ जना यात्रुहरूको शव नेपाल र भारतका विभिन्न ठाउँमा भेटिएको छ भने दुर्घटनाको १७औँ दिनसम्म पनि ३७ जनाको अवस्था अज्ञात छ । साउन ७ गतेबाट थप शवहरू पनि भेटिएका छैनन्।
खोजी र उद्धार कार्यमा समन्वय गरिरहेका सशस्त्र प्रहरीको कुरिनटारस्थित विपद् व्यवस्थापन तालिम केन्द्रका प्रशिक्षक प्रहरी वरिष्ठ उपरीक्षक माधव पौडेलले भारतीय टोलीले पनि त्रिशूलीको जटिलता आफूहरूका लागि नौलो भएको आफूहरूसँग बताएको जानकारी दिए।
उनका अनुसार त्रिशूली नदीमा पानीको बेग अत्यधिक छ भने कुनाकाप्चा, ठूला–ठूला भुल्का र २६ मिटरसम्म गहिरो भागहरू छन्। त्यो भनेको एउटा आठ–नौ तल्लाको घर जति गहिरो ठाउँ हो ।
भारतीय टोलीले पनि सिमलताल र चितवनकै गाइघाटबीचको क्षेत्रमा बस हुनसक्ने आकलन गरेको र त्यसबारे विस्तृत प्रतिवेदन दिने जनाएको चितवनका सहायक प्रमुख जिल्ला अधिकारी भुसालले बताए।
भारतीय टोली फर्किए पनि नेपाली सुरक्षा निकायबाट हराइरहेका बस र यात्रुहरूको उद्धार जारी रहने उनले जानकारी दिए ।
गत असार २८ गते शुक्रबार बिहान पहिरोमा परेर त्रिशूलीमा बगेका २ बसको अवस्था अझै अज्ञात छ।
काठमाडौँबाट गौरतर्फ गइरहेको बागमती प्रदेश ०३–००१ ख २४९५ नम्बरको बस र वीरगन्जबाट काठमाडौँतर्फ गइरहेको बागमती प्रदेश ०३–००६ ख १५१६ नम्बरको बस भरतपुर महानगरपालिका-२९, सिमलतालमा पहिरोमा परेर त्रिशूलीमा बगेका थिए।
दुवै बसमा गरी ६५ यात्रु रहेकोमा तीन जना बँच्न सफल भएका थिए ।
