काठमाडौँ । राष्ट्रिय जनमोर्चाले हवाईजहाज दुर्घटनामा क्षतिपूर्तिबारे विवाद हुनुलाई दुखद बताएको छ ।
उपाध्यक्ष तथा प्रवक्ता दुर्गा पौडेलको हस्ताक्षरमा २०८१ साउन १२ गते शनिबार प्रेसवक्तव्य जारी गर्दै राजमोले यस्तो प्रतिक्रिया दिएको हो ।
साउन ९ गते सौर्य एयरलाइन्स दुर्घटनमा मृत्यु भएका मृतकका परिवारले क्षतिपूर्तिको माग राख्दै शव नबुझेको सन्दर्भमा राजमोले यस्तो हुनुलाई दुखद् बताएको छ ।
संसारभरि हवाईजहाज दुर्घटना हुने गरेको र मृतकका परिवारलाई अविलम्ब क्षतिपूर्ति दिने गरिएको बताउँदै राजमोले सम्बन्धित एयरलाइन्स र प्रशासनले तत्कालै क्षतिपूर्तिको व्यवस्था मिलाउन माग गरिएको छ ।
यस्तो छ, प्रेसवक्तव्यको पूर्ण पाठ :
“काठमाडौँबाट पोखरा जान लागेको सौर्य एयरलाइन्स त्रिभुवन एयरपोर्टमा दुर्घटना भएको र त्यसमा १८ जनाको मृत्यु र पाइलट १ जना घाइते भएको घटना अत्यन्त गम्भीर र दुःखद घटना हो ।
त्यो घटना किन भयो ? त्यसको लागि को जिम्मेवार छ ? त्यस विषयमा बेग्लै छानबिन भइरहेको छ र आउने दिनमा त्यस प्रकारका घटना घट्न नदिनका लागि गम्भीर ध्यान दिनुपर्ने आवश्यकता भएको कुरा प्रष्ट छ । त्यसबारे हामीलाई अहिले बढी केही भन्नु छैन तर यहाँ हामीले मुख्य उठाउन खोजेको प्रश्न मृतकका परिवारलाई क्षतिपूृर्तिको प्रश्न हो ।
थाहा भएअनुसार अहिले सौर्य एयरलाइन्स विमानको दुर्घटनापछि पीडित परिवारले क्षतिपूर्तिको माग गरिरहेका छन् र त्यसबारे निर्णय नहुँदासम्म शव नबुझ्ने अडान लिएका छन् । त्यस प्रकारको विवादका लागि हाम्रो पार्टीले अत्यन्त दुःख, क्षोभ र आश्चर्य पनि प्रकट गर्दछ ।
दुर्घटना भएपछि पीडितलाई स्वतः नै क्षतिपूर्ति दिने व्यवस्था गरिनुपर्दछ र त्यसबारे कुनै विवादको आवश्यकता नै छैन । त्यस्तो विषयमा पनि विवाद गर्नुपर्ने जुन परिस्थितिको सिर्जना भयो, त्यसका पछाडि प्रशासन र हवाईजहाज कम्पनी नै जिम्मेवार भएको कुरामा कुनै शङ्का छैन । जुन परिवारका कैयौँ सदस्यको मृत्यु भएको छ, कुनै कुनैको त एकै परिवारका तीन/तीन जनासम्मको मृत्यु भएको छ, त्यो अवस्थामा पीडित परिवारलाई कति धेरै मानसिक चोट पुगेको छ ? त्यो कसैले पनि सजिलैसित अनुमान गर्न सकिने कुरा हो । त्यस्तो अवस्थामा अलिकति पनि बेर नगरिकन मृतकका परिवारलाई क्षतिपूर्ति दिने कार्य गरिनुपर्दछ र त्यसमा गरिने कुनै पनि प्रकारको ढिलाइ अत्यन्त अफसोच र क्षोभको कुरा हो ।
संसारका सबै विकसित देशमा हवाई दुर्घटनामा मृत्यु हुने व्यक्तिका पीडित परिवारलाई क्षतिपूर्ति दिने व्यवस्था गरिएको छ । नेपालमा पनि त्यस प्रकारका कानुन बनेका छन् । नेपालमा अहिले जति क्षतिपूर्ति दिने व्यवस्था गरिएको छ, अन्तर्राष्ट्रिय प्रचलनका तुलनामा त्यो धेरै कम छ । कुनै व्यक्तिको मृत्युलाई राष्ट्रिय वा अन्तराष्ट्रिय रूपमा भेदभाव गर्न मिल्दैन । त्यसकारण नेपालमा पनि हवाई दुर्घटनामा हुने क्षतिपूर्तिको व्यवस्था अन्तर्राष्ट्रिय स्तरमा नै गरिनुपर्ने आवश्यकतामा हाम्रो पार्टीले जोड दिन्छ ।
अन्तमा, सौर्य हवाई दुर्घटनामा मृत्यु भएका परिवारलाई तुरुन्तै क्षतिपूर्ति दिने व्यवस्था गर्नका लागि हामीले प्रशासन, सरकारसमेत सित माग गर्दछौँ । उक्त दुर्घटनामा घाइते भएका पाइलटको उपचारको व्यवस्था भइरहेकोमा हामीले सन्तोष प्रकट गर्दछौँ तर त्यो दुर्घटनाका कारणले उनको सम्पूर्ण जीवनमा असर पार्ने कुरा प्रष्ट छ । त्यसकारण उनको सम्पूर्ण जीवन निर्वाहका लागि कम्पनीले पूरै क्षतिपूर्ति दिनुपर्ने र त्यसका लागि सरकारले प्रभावशाली कारबाही गर्नुपर्ने आवश्यकतामा पनि हाम्रो पार्टीले जोड दिन्छ ।”
