काठमाडौं । राष्ट्रिय जनमोर्चाले रोल्पाको त्रिवेणी गाउँपालिकामा बेवारिसे अवस्थामा रहेको बम बिस्फोटमा परी चार अबोध बालबालिकाको मृत्यु भएको घटनाको अनुसन्धान गर्न सरकारसँग माग गरेको छ ।

राष्ट्रिय जनमोर्चाका उपाध्यक्ष एवं प्रवक्ता दुर्गा पौडेलले आज एक विज्ञप्ति प्रंकाशित गरी घटनाको अनुसन्धान गर्न, पीडित परिवारलाई क्षतिपुर्ती दिन र दोषीमाथि कारबाही गर्न माग गर्नुभएको छ ।

रोल्पाको त्रिवेणी गाउँपालिकामा बिहीबार बम बिस्फोटमा परी ११ वर्षीया विमला खत्री, पाँच वर्षीय विजय खत्री, १३ वर्षीय गौरव नेपाली र १४ वर्षीय नोखीराम डाँगीको मृत्यु भएको थियो ।

यस्तै, पौडेलले विज्ञप्तिमा भारतीय सीमा क्षेत्रबाट नेपाली नागरिकहरुलाई ढिलै भए पनि उद्धार गरिएकोमा प्रशन्नता व्यक्त गर्दै भारतका विभिन्न ठाउँमा बेखर्ची भएर बसेका र नेपाल आउन चाहने नागरिकहरुको पनि उद्धार गर्न माग गर्नुभएको छ ।

यस्तो छ, वक्तव्य
‘भारतीय सिमामा रहेका सुदुरपश्चिमका नेपालीहरुलाई उद्दार गरी नेपालमा ल्याउन सम्बन्धित प्रदेश र जिल्लाहरु वा केन्द्रीय सरकारले खेलेको भूमिकालाई राष्ट्रिय जनमोर्चाले स्वागत गर्दछ । त्यो कार्य सम्पन्न गर्न धेरै ढिलो भएको छ । तैपनि ढिलो भएपनि भारतीय सिमामा अलपत्र परेका नेपालीहरुलाई नेपालमा ल्याएकोमा हामीले प्रसन्नता प्रकट गर्दछौं ।
त्यो कार्यलाई अरु निरन्तरता दिनुपर्ने आवश्यकता छ ।

लकडाउनका कारणले राजधानी वा अन्य विभिन्न स्थानहरुमा मानिसहरु अलपत्र परेर, बेखर्ची भएर वा दुःखसास्ती पाएर बसिरहेका छन् । उनीहरु मध्ये कैयौंलाई सम्बन्धित् जिल्ला वा पालिकाहरुले आ–आफ्नो ठाउँमा लैजाने काम गरेका छन् । तर केन्द्रीय सरकारको स्पष्ट नीति नभएका कारणले कैयौं ठाउँका नेपालीहरु आफ्नो गाउँघरमा जान पाएका छैनन् । त्यसप्रति पनि हामीले सरकारको ध्यान आकर्षित गराउन चाहन्छौं ।

भारतमा असंगठित क्षेत्रमा काम गर्ने नेपालीहरुले ठूलो संख्यामा धेरै नै दुःखसास्तीको जीवन बिताउनु परिरहेको छ । कम्पनीहरुमा काम बन्द हुँदा र कुनै तलब वा खर्च नपाउँदा भारतमा ठूलो संख्यामा नेपालीहरुले बेखर्ची भएर दुःखसास्ती पाउनु परेको छ । उनीहरुको उद्दार गर्ने जिम्मेवारी पनि सरकार कै हुन्छ वा हुनुपर्दछ । विश्व स्वास्थ्य संगठनको प्रोटोकल अनुसार उनीहरुको आवश्यक व्यवस्था गर्ने जिम्मेवारी भारत सरकारको हुनुपर्दथ्यो ।

तर त्यसले पनि त्यसरी बेखर्ची भएका नेपालीहरुको पूरा व्यवस्था गरेको पाइँदैन । त्यो अवस्थामा उनीहरुका लागि आवश्यक राहतको व्यवस्था गर्न वा उनीहरुको उद्दार गरी नेपालमा ल्याउने जिम्मेवारी नेपाल सरकारको नै हुन्छ । तर नेपाल सरकारले उनीहरुबारे पर्याप्त ध्यान दिएको पाइँदैन । त्यसबारे आवश्यक कदम चाल्नको लागि पनि हामीले सरकारसित माग गर्दछौं ।

रोल्पाको त्रिवेणी गाउँपालिकामा बम विस्फोटभई चार जना बालबालिकाहरुको मृत्यु भएकोमा हाम्रो पार्टीले गम्भीर दुःख प्रकट गर्दछ । द्वन्द्वकालको बेलामा यत्रतत्र फालिएका विस्फोटक पदार्थहरुको समयमा नै व्यवस्थापन गर्नु सरकार र सम्बन्धित राजनीतिक समूहको जिम्मेवारी हुन्थ्यो । तर त्यसबारे ध्यान नदिनाले नै चारजना निर्दोष बालबालिकाहरुको ज्यान गएको छ ।

हामीले ती बालबालिकाहरुप्रति श्रद्धाञ्जली र उनीहरुका शोक सन्तप्त परिवारप्रति समवेदना प्रकट गर्दछौं । त्यसका साथै हामीले यो कुरामा पनि जोड दिन्छौं कि, प्रथम, द्वन्द्वकालका त्यस प्रकारका विस्फोटक पदार्थहरुको पूरै छानवीन गरी त्यस प्रकारका अबैध सामाग्रीहरु हटाउने वा नष्ट गर्ने व्यवस्था गरियोस् । द्वितीय, मृतक बालबालिकाका बाबुआमा वा परिवार जनलाई पनि उचित क्षतिपूर्ति दिइयोस्।’