काठमाडौँ । सौर्य एयरलाइन्सको जहाज दुर्घटनामा मृत्यु भएकाहरुको शव पोष्टमार्टमको तयारी सुरु भएको छ । पोष्टमार्टमका लागि मृतक सबैको शव त्रिवि शिक्षण अस्पताल पुर्याइएको छ ।
त्रिवि शिक्षण अस्पतालका फरेन्सिक विभाग प्रमुख डा. गोपाल चौधरीका अनुसार पोस्टमार्टमका लागि तीन टोली खटिएका छन् ।
‘पोष्टमार्टमका लागि सबै चिकित्सकहरु तयारी अवस्थामा छौँ । कागजपत्र मिलाउने काम भइरहेको छ,’ निर्देशक काफ्लेले भने, ‘पोष्टमार्टमका लागि प्रहरीबाट मुचुल्का आउनु पर्छ । आफन्तहरु पनि आउनुपर्छ । त्यसपश्चात पोष्टमार्टम सुरु गर्छौँ ।’
जलेर मृत्यु भएका कारण शवहरुको पोष्टमार्टम दिनमा मात्रै गर्न सकिने उनले बताए । ‘शव चिनिने अवस्था छैन । हामीले दाँत हेरेर पहिचान गर्नुपर्छ । नभए सबैको डीएनए नै परीक्षण गर्नुपर्ने हुन्छ,’ उनले भने ।
बुधबार बिहान काठमाडौंबाट पोखराका लागि उडेको जहाज विमानस्थल परिसरमै दुर्घटनाग्रस्त हुँदा १८ जनाको ज्यान गएको छ भने विमान चालकको उद्धार गरी उपचार भइरहेको छ ।
