सम्पदा शर्मा ##

आँखाभरि आँसु झार्दै निस्किएको दिन
कहिले होला देश बन्ने झन् बिग्रियो किन ?

युवाजति विदेशिन एयरपोर्टतिर ताँती
हजुरबाले देश चलाउने विदेशिने नाति

देश बनाउने युवाहरू विदेशिनुपर्ने
वृद्ध अनि बालबालिकाले अब के पो गर्ने ?

कसले बुझ्ने यो देशमा म जस्ताका कुरा
सपनाजति मरिसके कहिले होलान् पूरा

हाँस्न खेल्न अति मन छ बाआमाको छेउमा
यै देशमा गरिखाने माहोल बनाइदेऊ न

शिक्षा स्वास्थ्य रोजगारीमा विदेशिने हामी
देश रित्तिन थालिसक्यो अझै कति जानी ?

देश हाँक्ने नेतृत्वको कहिले होस आउला ?
ढुक्क भई यै देशमा कहिले बस्न पाउँला ?

(सिमरा साहित्य समाज र सिमरा जेसिसको संयुक्त आयोजनामा २०८१ असार २९ गते शनिबार भानुजयन्तीको उपलक्ष्यमा आयोजित साहित्यिक कार्यक्रममा वाचन गरिएको कविता । सम्पदा बाराको सिमरास्थित सेन्ट अलफोनसास स्कुल, कक्षा ९ मा पढ्छिन् ।)