काठमाडौं । प्रधानमन्त्री पुष्पकमल दाहाल प्रचण्डले आज (शुक्रबार) विश्वासको मत लिँदै छन्। यसका लागि अहिले बिहान ११ बजे प्रतिनिधि सभा बैठक बस्दै छ।
राष्ट्रिय जनमोर्चाले प्रधानमन्त्री प्रचण्डको विपक्षमा मतदान गर्ने भएको छ । प्रतिनिधि सभामा राजमोको तर्फबाट अध्यक्ष चित्रबहादुर केसी हुनुहुन्छ ।
प्रधानमन्त्री प्रचण्डलाई विश्वासको मत नदिने निर्णय गरेको राजमोले अब बन्ने नयाँ सरकारले लिने नीतिका आधारमा समर्थन वा विरोध गर्ने महासचिव मनोज भट्टले जानकारी दिनुभयो ।
महासचिव भट्टले युगदर्शनसँग भन्नुभयो, ‘अब बन्ने नयाँ सरकार संविधानको कुन धारा अनुसार बन्छ, कस कसका बिचमा गठबन्धन हुन्छ र सरकारले कस्तो नीति तय गर्छ त्यसका आधारमा हामीले समर्थन वा विरोध गर्छौं ।’
अब बन्ने सरकार संविधानको धारा ७६(२) अनुसार बन्ने आकलन भएपनि ७६(३) अन्तर्गत बन्ने चर्चासमेत रहेको उहाँले बताउनुभयो । ७६(२) अन्तर्गत संसदमा बहुमतका आधारमा प्रधानमन्त्री नियुक्त हुने प्रावधान छ ।
त्यसअनुसार एमाले अध्यक्ष केपी ओली प्रधानमन्त्री बन्ने चर्चा छ ।
धारा ७६(३) अनुसार संसदको सबैभन्दा ठूलो दलका नेतालाई राष्ट्रपतिले प्रधानमन्त्रीमा नियुक्त गर्ने प्रावधान अन्तर्गत कांग्रेस सभापति शेरबहादुर देउवा पनि प्रधानमन्त्री बन्ने पनि कतिपयले औँल्याएका छन् । यद्यपी जुन धारा अन्तर्गत नयाँ प्रधानमन्त्री नियुक्त भएपनि सर्वोच्च अदालतमा मुद्दा पर्ने संकेत देखिएको छ।
राष्ट्रिय जनमोर्चाले यी सबै सम्भावना हेरेर नयाँ सरकारबारे धारणा बनाउने राजमो महासचिव भट्टले युगदर्शनसँगको कुराकानीमा स्पष्ट पार्नुभएको छ ।
संसदका दुई ठूला दल नेकपा (एमाले) र नेपाली कांग्रेसबीच गठबन्धन भएर एमाले सरकारबाट बाहिरिँदै समर्थन फिर्ता लिएपछि अल्पतमा परेका प्रधानमन्त्री प्रचण्डले पुनः संसद्बाट विश्वासको मत लिन लागेका हुन्।
संसदका दुई ठूला दलसहित अन्य केही साना दल विपक्षमा मतदान गर्ने भएपछि प्रधानमन्त्री प्रचण्डले संसदबाट विश्वासको मत नपाउने स्पष्ट छ ।
२७५ सदस्यीय प्रतिनिधि सभामा विश्वास मत पाउन बहुमत १३८ सांसदले पक्षमा मतदान गर्नुपर्छ। सरकारमा सहभागी दलले समर्थन फिर्ता लिएको ३० दिनभित्र प्रधानमन्त्रीले विश्वासको मत लिनुपर्ने संवैधानिक व्यवस्था छ।
प्रधानमन्त्री प्रचण्डका पक्षमा आफ्नो पार्टी माओवादी केन्द्रका ३२, राष्ट्रिय स्वतन्त्र पार्टीका २१ र नेकपा एकीकृत साजवादीका १० गरी ६३ मत मात्रै छ।
नयाँ गठबन्धन बनाएका नेपाली कांग्रेस र नेकपा एमालेले प्रधानमन्त्रीलाई विश्वासको मत नदिन आफ्ना सांसदलाई ह्विप जारी गरिसकेका छन्।
राप्रपा, जनता समाजवादी पार्टी, जनता समाजवादी पार्टी नेपाललगायतले पनि प्रधानमन्त्रीलाई विश्वासको मत नदिने निर्णय गरेका छन्।
प्रधानमन्त्री प्रचण्ड विश्वासको मतमा फेल हुनेबित्तिकै कांग्रेस–एमालेले संविधानको धारा ७६ (२) अनुसार आजै नयाँ सरकारको दाबी पेस गर्ने तयारी गरेका छन्।
