गिरीप्रसाद बुढा ।
राष्ट्रिय जनमोर्चा दैलेखको आयोजनामा भगवतीमाई गाउँपालिकामा कोणसभाको कार्यक्रम सम्पन्न भएको छ ।
भ्रष्टाचार र सङ्घीयताको विरुद्धमा सञ्चालित राष्ट्रिय जनमोर्चाको देशव्यापी कार्यक्रमअन्तर्गत उक्त कार्यक्रम सम्पन्न भएको हो ।
कोणसभामा राजमो कर्णाली प्रदेश सदस्य नरबहादुर सिंहले मन्तव्य राख्नुभएको थियो ।
मन्तव्यको क्रममा उहाँले सङ्घ, प्रदेश र स्थानीय गरी तीनओटै तहमा भ्रष्टारको जालो फिजिएको र सबैतिर जनताले तिरेको करको रकम व्यापक रूपमा दुरुपयोग भइरहेको भन्दै सरोकारवालाले यस्तो हुन नदिन ध्यान दिनुपर्ने विचार व्यक्त गर्नुभएको थियो ।
सत्ताधारीहरूले भ्रष्टाचार जस्तो जघन्य कसुर गर्ने व्यक्तिलाई कारबाही गर्नुको उल्टो बचाउ गर्न उद्यत रहेकोमा शाहीले चिन्ता व्यक्त गर्नुभएको थियो ।
त्यसैगरी, जनता र देशको निमित्त भालुको कञ्चट भएको सङ्घीयता खारेज गरी प्रजातान्त्रिक विकेन्द्रीयतामा आधारित स्थानीय स्वशासनसहितको एकात्मक शासन प्रणाली लागु गर्नु आजको आवश्याकता रहेको कुरामा पनि उहाँले विशेष जोड दिनुभएको थियो ।
कार्यक्रममा रक्तिम सांस्कृतिक अभियानका जिल्ला समिति सदस्य कर्णबहादुर सिंह, राजमो जिल्ला समिति दैलेखका सदस्य हर्क रेग्मी, राजमो भगवतिमाई गाउपालिकाका सदस्य पदम खड्कालगायतका नेताकार्यकर्ताको उपस्थिति रहेको थियो ।
