महेश रिजाल, भालुवाङ (दाङ) ।
गत असार १२ गते राप्ती गाउँपालिका वडा नं. १ पाखापानिस्थित रामजहदी सामुदायिक वन बाट बिच्किएर गाउँ पसेको जङ्गली चित्तल कुकुरले लखेट्दा घाइते अवस्थामा उद्धार गरिएको आज आठौँ दिन उपचारको क्रममा असार १९ गते मृत्यु भएको छ ।
उक्त घाइते चित्तललाई उद्धार गर्न सामुदायिक वनका उपभोक्ता, वन कार्यालयका कर्मचारी, जनपद तथा सशस्त्र प्रहरी समेतले उद्धार गरी डिभिजन वन कार्यालय लमही दाङको आदेशमा उक्त रामजहदी सामुदायिक वनको हरितपार्क पुल्चोकमा राखी पशु भेटेनरी प्राविधिकद्वारा उपचार भइरहेको थियो ।
चित्तलको पछाडिको दाया खुट्टा भाचिनुका साथै शरीरका विभिन्न भागमा चोट लागेको थियो । अन्दाजी ५५ किलो तौल, एक मिटर उचाइ र ६ फिट लम्बाइ रहेको उक्त भाले चित्तल घाइते अवस्थामा उद्धार भएलगत्तै उपचारपश्चात् बाच्ने सम्भावना रहेकोमा एकाएक दुब्लाउँदै र कमजोर हुँदै जाँदा आज आठौँ दिनका दिन मृत्यु भएको हो ।
मृतक चित्तललाई सबडिभिजन वन कार्यालय मसुरिया राप्तीका प्रमुख विनोदकुमार शाह, इलाका प्रहरी कार्यालय भालुवाङका प्रतिनिधि र राप्ती गाउँपालिका वडा नं. १ का प्रतिनिधिसमेतको रोहबरमा दफनाइएको रामजहदी साबउसका अध्यक्ष दिल्लीराज सुवेदीले जानकारी दिनुभयो ।
