धनगढी । सुदूरपश्चिम प्रदेशका मुख्यमन्त्री दीर्घबहादुर सोडारीले सत्तारुढ दलहरुलाई भाग पुर्याउन ४ वटा मन्त्रालय फुटाएका छन्।
सत्तारुढ दल नेकपा एमाले, नेकपा माओवादी केन्द्र, नागरिक उन्मुक्ति र नेकपा एकीकृत समाजवादीका लागि मन्त्रालय टुक्र्याएका हुन् ।
भौतिक पूर्वाधार विकास मन्त्रालय, सामाजिक विकास मन्त्रालय, भूमि व्यवस्था कृषि तथा सहकारी मन्त्रालय र उद्योग पर्यटन वन तथा वातावरण मन्त्रालय फुटाइएको छ ।
यो सँगै सुदूरपश्चिममा मन्त्रालयको संख्या १० पुगेको छ ।
भौतिक पूर्वाधारलाई फुटाएर जलस्रोत तथा सहरी विकास मन्त्रालय र भौतिक पूर्वाधार तथा यातायात विकास मन्त्रालय बनाइएको छ ।
यस्तै, सामाजिक विकास मन्त्रालय फुटाएर शिक्षा युवा तथा खेलकुद र स्वास्थ्य महिला तथा बालबालिका मन्त्रालय बनाइएको छ ।
उद्योग पर्यटन वन तथा वातावरण मन्त्रालय र भूमि व्यवस्था कृषि तथा सहकारी विकास मन्त्रालयका महाशाखा गाभेर ३ मन्त्रालय बनाइएको छ ।
ती २ मन्त्रालय समायोजन गरेर वन वातावरण तथा सहकारी मन्त्रालय, कृषि तथा भूमि सुधार मन्त्रालय र उद्योग वाणिज्य पर्यटन तथा संस्कृति मन्त्रालय बनाइएको छ ।
मन्त्रालय फुटाएसँगै प्रदेश सरकारमा रहेका ५ जना विना विभागीय मन्त्रीलाई जिम्मेवारी पनि दिइएको छ।
मन्त्रालयल फुटाएसँगै बिना विभागीय मन्त्री रहेका एमाले वीरबहादुर थापा र हिरा सार्की, माओवादीबाट नियुक्त मन्त्री ओम विक्रम भाट र लक्ष्मी विक र एकीकृत समाजवादीकी माया पन्तले मन्त्रालयको जिम्मेवारी पाएका छन्।
