काठमाडौँ । राष्ट्रिय जनमोर्चाका केन्द्रीय सल्लाहकार तथा राष्ट्रियसभाका सांसद राजेश विश्वकर्मा (तुलप्रसाद) ले अर्थमन्त्रीसमक्ष आफू बजेट पाउन के कारणले अयोग्य भएँ भनी प्रश्न राख्नुभएको छ ।
२०८१ असार १३ गते बिहीबार राष्ट्रियसभामा विनियोजन विधेयकमाथि आफ्नो धारणा राख्दै उहाँले यस्तो अभिव्यक्ति दिनुभएको हो ।
‘मैले पोहोर पनि तीनओटा योजनाका लागि बजेट मागेको थिएँ, त्यसमध्ये एउटा योजना पनि परेन’ उहाँले अगाडि भन्नुभयो– ‘अहिलेको आवका लागि छओटा योजनाका लागि बजेट मागेको थिएँ, अहिले पनि बजेटमा मेरा एउटा योजना परेनन् ।’
सांसद विश्वकर्माले भन्नुभयो– ॅम के कारणले बजेट पाउन अयोग्य भएँ ? मैले किन योजनाका लागि बजेट पाउन सकिन ? माननीय अर्थमन्त्रीले जवाफ दिनुहोला ।’
मन्तव्यको क्रममा उहाँले बजेट सन्तुलित नभएको टिप्पणी पनि गर्नुभयो । ६१ प्रति साधारण खर्च र १८ प्रतिशत मात्रै पुँजीगत खर्च छुट्याइएको सन्दर्भमा उहाँले यस्तो अभिव्यक्ति दिनुभएको हो ।
उहाँले पुँजीगत खर्च कम हुँदा रोजगारी सिर्जना नहुने तथा त्यसले सरकारले कर पनि पाउन नसक्ने बताउनुभयो ।
त्यस्तै, उहाँले सुदूरपश्चिम, कर्णालीले कम बजेट पाएको तर झापा तथा पूर्वतर्फका कैयौँ जिल्लाले बढी बजेट पाएकोमा असन्तुष्टि व्यक्त गर्नुभयो ।
दलित उत्पीडतमाथि कारबाही होस्
आजै राष्ट्रियसभाको विशेष समयमा बोल्दै उहाँले दलित उत्पीडनका तीनओटा घटनामा छानबिन गरी कारबाही गर्न सरकारसमक्ष आग्रह गर्नुभयो ।
सम्बोधनको क्रममा उहाँले अछामको विनायक पञ्चदेवलमा छाउगोठमा दलित किशोरीमाथि बलात्कार भएको प्रसङ्ग अगाडि सार्दै १३ वर्षे किशोरमाथि लागेको आरोपप्रति शङ्का व्यक्त गर्नुभयो ।
उहाँले भन्नुभयो– ॅकतै निर्मला पन्त बलात्कार प्रकरणमा जस्तै यस प्रकरणमा वास्तविक अपराधी बाहिर त छैन ?’
त्यस्तै, उहाँले सुर्खेतकै पञ्चपुरीकी २० वर्षीय बालिकामाथि भएको बलात्कार तथा निजको गर्भ रहेपछि अपराधी मदन कार्कीलाई भगाइएको प्रसङ्ग पनि उठाउनुभयो ।
एवम् प्रकारले शिक्षक सेवामा कार्यरत एक जना दलित किशोरीमाथि कार्यक्रम प्रमुखले नै बलात्कार गरेको सवाल पनि उठाउनुभयो ।
उहाँले यी सबै प्रकरणमा तत्कालै छानबिन भएर कारबाही गर्न आग्रहसमेत गर्नुभयो ।
