काठमाडौं । नेपाल कम्युनिष्ट पार्टी (मसाल) ले भारतीय सीमा क्षेत्रमा अलपत्र नेपालीहरुलाई स्वदेश आउन दिन सरकारलाई दबाब दिएको छ । सीमामा अलपत्र नेपालीलाई देशभित्र आउन र काठमाडौंलगायत शहरी क्षेत्रमा रहेका तर घर जान चाहनेहरुलाई जान दिन लगातार जोड दिँदै आएको मसालले सरकारसँग पुनः माग गरेको छ ।
आइतबार प्रवक्ता रामप्रकाश पुरीले प्रेशित गर्नुभएको वक्तव्यमा अब विदेशमा रहेका लाखौं नेपाली क्रमशः स्वदेश फर्कने अवस्था आएकोले उनीहरुको लागि देशभित्रै उचित व्यवस्थापन गर्ने गरी दिर्घकालिन योजना बनाउन आग्रह गरिएको छ । तत्कालका लागि भारतबाहेक विदेशमा रहेका नेपालीहरुको उचित व्यवस्थापनका लागि सम्बन्धित देशहरुसँग कूटनीतिक पहल गर्न पनि मसालले जोड दिएको छ ।
वक्तव्यमा भनिएको छः ‘कोरना भाइरसको अवस्थामा विदेशस्थित नेपालीहरु वा भारतीय सीमा र नेपालभित्र बिभिन्न स्थानहरुमा रोकिएर बसेका नेपालीहरुबारे पार्टीको नीति स्पष्ट गर्नका लागि यो वक्तव्य जारी गरिएको छ ।
१. कोरना भाइरसको आतंक, विश्वव्यापी आर्थिक मन्दीका कारणले रोजगारीको अवसरमा कमी र कैयौं देशका सरकारहरुको अप्रवासीहरुलाई देशबाट निकाल्ने समेत नीतिहरुका कारणले भारत वा विदेशस्थित लाखौं नेपालीहरु नेपालमा फर्केर आउने कुरा निश्चित छ ।
२. तत्काल सम्बन्धित देशहरुका सरकारहरुसित पहलकदमी गरेर विश्व स्वास्थ्यसंगठनको प्रोटोकल अनुसार विदेशमा नेपालीहरु जहाँ छन् त्यहीँ व्यवस्था गर्न जोड दिने नीति अपनाउनुपर्दछ । तर अहिलेको लकडाउन अनिश्चित कालसम्म रहने छैन र त्यसपछि नेपालीहरु आफ्नो देशमा फर्कने क्रम बढेर जाने छ ।
३. त्यसरी नेपाल आउने नेपालीहरुको व्यवस्थापन वा रोजगारीका लागि सरकारले दीर्घकालीन योजना बनाउनुपर्दछ । त्यसप्रकारको योजना खास गरेर कृषिको उत्पादन र उद्योगधन्दाको विकासका लागि बनाउनुपर्दछ ।
४. तर विदेशस्थित नेपालीहरुबारे दीर्घकालीन रुपमा त्यसप्रकारको नीति अपनाए पनि अहिले भारतीय सीमामा रोकिएर बसेका नेपालीहरुलाई तुरुन्त नेपाल ल्याउने व्यवस्था गर्नुपर्छ । ५ नं. पद्रेशमा त्यो कामको थालनी भएको छ र अन्यत्र पनि त्यो काम गरिनुपर्दछ ।
५. राजधानी वा अन्य स्थानहरुमा रोकिएका नेपालीहरुलाई आफ्नो गाउँघरमा जानका लागि आवश्यक व्यवस्था गरिनुपर्दछ । भारतीय सीमामा वा नेपालमा बिभिन्न स्थानमा रोकिएका नेपालीहरुलाई कडाइपूर्वक स्वास्थ्य जाँच गरेर कोरना भाइरस पोजिटिभ देखिएकाहरुलाई क्वारेन्टिनमा राख्ने र अरुलाई होम क्वारेन्टिनमा राख्ने व्यवस्था गरिनुपर्दछ ।
६. खाडीका देशहरुका बिभिन्न सरकारहरुले करिब एकलाख नेपालीहरुलाई त्यहाँबाट निकाल्ने दबाव दिएको जानकारी त्यहाँका नेपाली राजदूतावासहरुद्वारा थाहा भएको छ । त्यसबारे सरकारले ठोस नीति अपनाउनु आवश्यक छ ।’
