काठमाडौं । जोन्स हप्किन्स विश्वविद्यालयको तथ्यांकअनुसार अमेरिकामा कोरोनाभाइरसका कारण मृत्यु हुनेको संख्या ५०,००० नाघेको छ । अमेरिकामा विगत २४ घण्टामा मात्रै ३,००० भन्दा बढी मानिसको ज्यान गएको छ । अहिले अमेरिकामा ८,७०,००० भन्दा बढी संक्रमित भएको पुष्टि भएको छ ।
तर संक्रमणको तथ्यांक विश्लेषण गर्दा युरोपेली राष्ट्रको दाँजोमा अमेरिकामा अझै पनि मृत्युदर कम रहेकोमा ह्वाइट हाउसको कार्यदलले जोड दिएको छ।
हप्तौँपछि अमेरिकाका केही भाग पुनः खुलेपछि यो भयावह समाचार आएको हो । अहिलेसम्मको संख्या हेर्दा अमेरिकामा कोरोनाभाइरसका कारण संक्रमित हुने र मृत्यु हुनेको संख्या विश्वमै बढी छ ।
अमेरिकाको जनसङ्ख्या ३३ करोड छ जुन कोरोनाभाइरसबाट अतिप्रभावित स्पेन र इटलीको भन्दा धेरै हो ।
ह्वाइट हाउसको कोभिड–१९ कार्यदलका विज्ञ डेबोरा बिर्क्सले अमेरिकामा ‘पूरै विश्वमा भएकामध्ये कम मृत्युदर’ रहेको बताइन् । प्रतिव्यक्तिको आधारमा हेर्दा अहिले अमेरिकामा कोभिड–१९ का कारण मृत्युदर स्पेन, इटली, फ्रान्स, बेल्जम र यूकेको भन्दा कम छ ।
कोरोनाभाइरसका कारण मृत्यु भएको संख्या हेर्दा अमेरिका भयावह अवस्थामा छ । तर यसले वास्तविक रूप पूरै चित्रण गर्दैन । त्यसको एउटा कारण भनेको जनसंख्या हो । जनसंख्याको आधारमा अमेरिकाभन्दा युरोपका थुप्रै देशमा धेरै मानिसको मृत्यु भएको छ । समग्रमा युरोपमा जनसंख्या हेर्दा प्रतिव्यक्ति बढी मृत्यु भएको देखिन्छ ।
विश्वभर २७ लाख ७५ हजार ७३८ जना संक्रमित भएका मध्ये १ लाख ९७ हजार १९९ जनाको मृत्यु भएको छ भने ७ लाख ५० हजार २१५ जना निको भएका छन् ।
