सन्धिखर्क । धारापानी–रुपन्देही सम्पर्क मञ्चले ढाकाबाङका आगलागीपीडितलाई आर्थिक सहयोग गरेको छ ।
भूमिकास्थान नगरपालिका वडा नम्बर ३ र ४ साविक धारापानी गाविसबाट विभिन्न सिलसिलामा रुपन्देहीमा रहेकाहरूबिच खोलिएको मञ्चले सोही पालिका वडा नम्बर–१ ढाकाबाङ साम्नेगाउँका आगलागीपीडित टेकबहादुर थापालाई आर्थिक सहयोग गरेको हो ।
२०८१ असार २ गते आइतबार भूमिकास्थान नगरपालिका नगरस्तरीय युवा सञ्जालका संयोजक टेकराज भुसालले भूमिकास्थान–१ का वडासदस्य मेघराज खनाल, गोपाल नेपाली र बालशिक्षा माविका अध्यक्ष काशबहादुर गमाललगायतको उपस्थितिमा समाजका आगलागीपीडित थापाको घरमै पुगी पीडितलाई मञ्चले पठाएको नगद रु. पाँच हजार रुपैयाँ र भूमिकास्थान–३ धारापानी हाल अमेरिकामा रहनुभएका बिमल बन्जाडेले पठाएको पाँच हजार रुपैयाँ गरी एकमुष्ट १० हजार रुपैया सहयोग रकम पीडित थापालाई हस्तान्तरण गर्नुभएको थियो ।
सो अवसरमा संयोजक भुसालले सानो सहयोगले पनि पीडितलाई ठुलो राहत मिल्ने बताउँदै सहयोग गर्ने सम्पर्क मञ्च र बिमल बन्जाडेलाई धन्यवाद व्यक्त गरेको मञ्चका महासचिव सन्तोष बन्जाडेले जानकारी दिनुभयो ।
