काठमाडौँ । मजदुर नेता नारायण सापकोटा अस्ताउनुभएको छ ।
ब्रेन ट्युमरद्वारा गत एक सालदेखि पीडित सापकोटाको २०८१ जेठ २८ गते सोमबार काठमाडौँमा निधन भएको हो ।
काठमाडौँ र चितवनका विभिन्न अस्पतालमा उपचाररत सापकोटा पछिल्लो समयमा वीर अस्पतालबाट डिस्चार्ज हुनुभएको थियो ।
स्मृतिशेष सापकोटा अखिल (छैठौँ) हुँदै अखिल नेपाल ट्रेड युनियन महासङ्घ (अन्टुक) को केन्द्रीय अध्यक्षसमेत रहनुभएको थियो ।
उहाँको परिवारमा पत्नी मञ्जु र दुई छोरीहरू रहेका छन् ।
मसालद्वारा श्रद्धाञ्जली
यसैबिच, नेकपा (मसाल) ले सापकोटाको निधनमा श्रद्धाञ्जली व्यक्त गरेको छ ।
महामन्त्री मोहनविक्रम सिंहको हस्ताक्षरमा जेठ २८ गते नै शोकवक्तव्य जारी गर्दै पार्टीले श्रद्धाञ्जली व्यक्त गरेको हो ।
सापकोटाको निधनले कम्युनिस्ट आन्दोलनलाई गम्भीर क्षति भएको बताइएको उक्त शोकवक्तव्यको पूर्ण पाठ यस्तो छ :
“बागलुङ जिल्ला गल्कोट रिस्मी निवासी कामरेड नारायण सापकोटाको मृत्युप्रति गहिरो दुःख व्यक्त गर्दै हामीले उहाँका सन्तप्त परिवारजनप्रति हार्दिक समवेदना व्यक्त गर्दछौँ ।
कामरेड सापकोटा लामो समयदेखि नेपालको कम्युनिस्ट आन्दोलनमा सक्रिय रहँदै आउनुभएको थियो । त्यसरी नेपालको कम्युनिस्ट आन्दोलनमा उहाँको महत्त्वपूर्ण योगदान रहेको छ । उहाँको मृत्युबाट नेपालको कम्युनिस्ट आन्दोलनलाई गम्भीर क्षति भएको छ ।
अन्तमा हामीले उहाँप्रति हार्दिक श्रद्धाञ्जली व्यक्त गर्दछौँ ।”
