धनगढी । सुदूरपश्चिम प्रदेशमा नेकपा माओवादीभित्र भाँडभैलो भएको छ ।
प्रदेश सरकारमा मन्त्री बन्ने विषयले माओवादी भित्रका दुई गुटको विवाद छताछुल्ल भएको हो ।
सोमबार मुख्यमन्त्री दीर्घबहादुर सोडारीले सरकार विस्तार गरेका छन्। माओवादी केन्द्र र नेकपा एमाले सरकारमा सामेल भएका छन् । माओवादी केन्द्रबाट अक्कलबहादुर रावल, ओमविक्रम भाट र लक्ष्मी विक मन्त्री बनेका छन्।
तर खगराज भट्टसहित माओवादीका ५ सांसदले मन्त्रीका लागि सिफारिस गरिएको नाममा आपत्ति जनाएका छन्। उनीहरुले मुख्यमन्त्री सोडारीलाई ध्यानाकर्षण पत्र लेख्दै मन्त्री नियुक्ति प्रकृया रोक्न माग गरेका छन्। खगराज, झपटबहादुर साउद, शिवसिंह ओली, रमेश धामी र जानकी कुँवरद्वारा हस्ताक्षर ध्यानाकर्षण पत्रमा संसदीय दल र पार्टीमा छलफल नगरी मन्त्रीको नाम सिफारिस गरिएको उल्लेख छ ।
यसअघि संसदीय दलको नेता रहेका खगराज भट्टलाई हटाएर त्यहाँ बहुमत सांसदहरूले मानबहादुर धामीलाई संसदीय दलको नेता बनाएपछि विवाद चर्किएको थियो ।
