काठमाडौँ । छ पत्रकार सङ्गठनहरूले आगामी जेठ ३२ गतेभित्र शुद्धीकरणसहितको मतदाता नामावली र असारको दोस्रो हप्ताभित्र तीनै तहको निर्वाचन सुनिश्चित गर्न नेपाल पत्रकार महासङ्घसित माग गरेको छ ।
२०८१ जेठ २७ गते आइतबार संयुक्त प्रेसविज्ञप्ति जारी गर्दै उनीहरूले यस्तो माग गरेका हुन् ।
प्रेस सेन्टरको केन्द्रीय कार्यालय बबरमहलमा सम्पन्न बैठकद्वारा जारी प्रेसविज्ञप्तिमा पत्रकार महासङ्घले अहिलेसम्म मतदाता नामावली घोषणा नभएको, निर्वाचनको मितिसमेत किटान नगरिएकाले निर्वाचनको सन्दर्भमा अन्यौलता सिर्जना भएको बताइएको छ ।
महाससङ्घ आफैले घोषणा गरेको निर्वाचन मिति जेठ २६ गते चुनाव नहुँदा मूल नेतृत्वको निर्वाचन क्षमतामाथि प्र्रश्न उठेको बताउँदै प्रेसवक्तव्यमा अगाडि भनिएको छ– “पत्रकार महासङ्घको निर्वाचन समयमा हुन नसक्नुले पत्रकारहरूको महासङ्घको मूल नेतृत्वको निर्णय क्षमतामाथि प्रश्न उठेको मात्रै छैन, महासङ्घ नेतृत्वलाई अमूक सङ्गठनको छाया संस्थामा परिणत गर्न चाहान्छ भन्ने प्रमाणित भएको छ ।”
प्रेसविज्ञप्तिमा असार दोस्रो हप्ताभित्र निर्वाचन गर्ने प्रतिबद्धता पूरा गर्न, शुद्धीकरण कार्यदलले दिएको प्रतिवेदनको आधारमा सक्रिय पत्रकार नछुट्ने गरी मतदाता नामावली टुङ्गो लगाउन, जेठ ३२ गतेभित्र नामावली सार्वजनिक गर्न र पत्रकार महासङ्घको वैधानिकता कायम गर्दै निर्वाचन गर्न माग गरिएको छ ।
विज्ञप्तिमा प्रेस चौतारीका अध्यक्ष गणेश बस्नेत, प्रेस सेन्टरका अध्यक्ष विष्णु सापकोटा ॅजुगल’, समाजवादी प्रेस सङ्गठनका अध्यक्ष विश्वमणि सुवेदी, प्रगतिशील पत्रकार सङ्घका अध्यक्ष श्यामलाल पोखरेल, जनपत्रकार सङ्गठनका अध्यक्ष शेरबहादुर विश्वकर्मा र क्रान्तिबारी प्रेस सङ्गठनका अध्यक्ष कमल बुढाको हस्ताक्षर रहेको छ ।
