बेलबारी (मोरङ) । बेलबारी नगरपालिका–१ मोरङस्थित सगरमाथा इङलिस स्कुलले तीनदिने शिक्षक तालिम प्रारम्भ गरेको छ ।
२०८१ जेठ १२ गतेदेखि सुरु भएर जेठ १४ गतेसम्म चल्ने गरी स्कुलले तालिम सुरु गरेको हो ।
स्कुलले आफ्ना २३ जना, बालजगत् इङलिस स्कुल, बेलबारी–९ डाँगिहाटका पाँच जना, स्काई इङलिस स्कुल, बराहक्षेत्र–३, सुनसरीका २ जना र सुनसरी स्टार इङलिस स्कुल, बराहक्षेत्र–६, सुनसरीका ५ जना गरी जम्मा ३५ जना शिक्षकशिक्षिकालाई तालिम दिएको छ ।
तालिमको उद्घाटन सत्रमा बेलबारी नगर प्याब्सनका अध्यक्ष भगवतीप्रसाद घिमिरेले गर्नुभयो ।
अध्यक्ष घिमिरेले यस्ता आधारभूत विषयको तालिम शिक्षकशिक्षिकालाई अत्यन्त उपयोगी हुने हुँदा प्याब्सनले पनि चाँडै आयोजना गर्ने जानकारी गराउँदै तालिमपछि सहभागीले अझ व्यवस्थित र प्रभावकारी शिक्षण गर्ने कुरामा विश्वास व्यक्त गर्नुभयो ।
अनुसन्धान तथा विकास मञ्च बेलबारीका अध्यक्ष उपप्राध्यापक भीमबहादुर बस्नेतले यस्ता तालिमले शिक्षकलाई अझ अनुभवी र क्षमतावान् बनाउने विश्वास व्यक्त गर्नुभयो ।
स्कुलका निर्देशक लेखबहादुर धिमालले स्कुलले तालिमको आयोजना गर्नुको मुख्य उद्देश्य गुणस्तरीय शिक्षणका माध्यमबाट दक्ष विद्यार्थी उत्पादन गर्नु रहेको बताउनुभयो ।
प्रिन्सिपल इरानकुमार राईले निजी विद्यालयका शिक्षक सबैले शिक्षा सङ्कायबाट शिक्षा प्राप्त गरेको हुन नसक्ने, शिक्षकहरू विज्ञान, व्यवस्थापन, मानविकी, प्राविधिकलगायतका क्षेत्रबाट पनि आउने भएकाले शिक्षणका आधारभूत ज्ञान, सिपलाई बुझ्न/बुझाउन छिमेकी स्कुलका शिक्षकसमेतलाई तालिमको व्यवस्थापन गरेको बताउनुभयो ।
साथै, बाँकी चार विषयहरू “शिक्षाका उद्देश्यहरू”, “केस स्टडी”, “मूल्याङ्कन प्रक्रिया” तथा “आफ्नो विषयमाथि अनुसन्धान” यही जेठ १९ गते प्रशिक्षक गणेप्रसाद दाहालले तालिम दिनुहुने पनि प्रिन्सिपलले राई जानकारी दिनुभयो ।
तालिमको पहिलो दिन “पाठयोजना” र “शिक्षण विधि” विषयमा अग्रज शैक्षिक व्यक्तित्व अमृतप्रसाद आचार्यले तालिम प्रदान गर्नुभएको थियो ।
उक्त तालिमको उद्घाटनमा स्काई स्कुलका अध्यक्ष राजन राई तथा सुनसरी स्टारका प्रिन्सिपल अवियोग राई सहभागी पनि हुनुहुन्थ्यो ।
तालिम स्कुलकै तालिमहलमा आयोजना गरिएको छ ।
