बागलुङबजार । बुद्धजयन्तीको अवसरमा बागलुङ काठेखाला तङ्ग्रामस्थित नेपालकै ठुलो नगरा लोकार्पण गरिएको छ ।
जिल्ला समन्वय समिति बागलुङका प्रमुख अमर थापाले रिबन काट्दै पर्दा हटाएर २०८१ जेठ १० गते सो नगराको उद्घाटन गर्नुभएको हो ।
गाउँमैत्री अक्षयकोष (जिमाक) द्वारा आयोजित उक्त कार्यक्रममा नगराका साथै रिबन काटेर तथा ताम्रपत्र खोलेर सांस्कृतिक सङ्ग्रहालयको पनि उद्घाटन गरिएको थियो ।
सो अवसरमा ज्ञानोदय बौद्ध विहारका प्रमुख महेन्द्र भन्टेद्वारा गौतम बुद्धको मूर्ति अनावरण गरिएको थियो ।
कार्यक्रममा प्रमुख अतिथि थापाका साथै काठेखोला गाउँपालिकाका अध्यक्ष राजु थापा, उपाध्यक्ष तिलक थापा, पूर्व सभासद पियारी थापा र वरिष्ठ अधिवक्ता काजीगाउँले श्रेष्ठ, जिमाकका संरक्षक हेमराज आश्रम, ज्ञानोदय बौद्ध विहारका प्रमुख भन्टे, काठेखोला गाउँपालिकाका प्रवक्ता टीकासङ्गम विक, जनप्रेम माविका नइन्द्रबहादुर गुरुङ, काठेखोला–१ का वडाअध्यक्ष खडक थापा र वडा नम्बर ४ का अध्यक्ष लक्ष्मण पुन र राष्ट्रिय जनमोर्चा, नेपाली काङ्ग्रेस, नेकपा (माओवादी केन्द्र), नेकपा (एकीकृत समाजवादी, नेकपा, क्रान्तिकारी कम्युनिस्ट पार्टीलगायतका जिल्ला प्रतिनिधिले पनि मन्तव्य राख्नुभएको थियो ।
जिमाकका सचिव सुकमाया पुनको सञ्चालनमा अघि बढेको सो कार्यक्रमका अध्यक्षता चइन्द्रबहादुर थापाले गर्नुभएको थियो ।
कार्यक्रममा नगर्चीद्वय नरबहादुर परियार र जगबहादुर परियारले नगरावादन गर्नुभएको थियो ।
सांस्कृतिक सङ्ग्रहालय निर्माणको क्रममा जग्गा दान गर्ने, नगरा निर्माणमा सहयोग गर्ने कालिगढ तथा भवन निर्माणको क्रममा विभिन्न सामग्री सहयोग गर्ने सहयोगीलाई कार्यक्रममा सम्मान गरिएको थियो ।
कार्यक्रममा सांस्कृतिक झाँकी, पञ्चेबाजा र सोरठी समूहबाट कार्यक्रम प्रस्तुत गरिएको थियो । सो अवसरमा इन्द्रबहादुर मल्ल र निश्चल श्रेष्ठ पाण्डालगायतका कलाकारले विविध प्रस्तुति राख्नुभएको थियो ।
त्यस्तै, त्रिवेणी आमा समूह र उत्तरगङ्गा सोरठी समूहले सम्पूर्ण उपस्थित सहभागीलाई भोजनको व्यवस्था गरेका थिए ।
