वीरेन्द्रनगर । रक्तिम सांस्कृतिक अभियानद्वारा सञ्चालित कर्णाली सांस्कृतिक अभियान सुर्खेतको पञ्चपुरी र चौकुने गाउँपालिकामा पुगेको छ ।
रक्तिमका अध्यक्ष गिरीप्रसाद बुढा र वरिष्ठ उपाध्यक्ष जीवनको सञ्चालन तथा सहजीकरणमा २०८१ जेठ ५ गते शनिबार पञ्चपुरी नगरपालिकाअन्तर्गत बाबियाचौर र चौकुने गाउँपालिकाअन्तर्गत बिजौरामा विविध सांस्कृतिक कार्यक्रम सम्पन्न भएको हो ।
बाबियाचौरमा सम्पन्न कार्यक्रममा रक्तिमका केन्द्रीय समितिका वरिष्ठ उपाध्यक्ष शाहीले कार्यक्रम सञ्चालन गर्नुभएको थियो भने बिजौराको कार्यक्रममा अध्यक्ष बुढाले सहजिकरण गर्नुभएको थियो ।
ती दुवै स्थानका कार्यक्रममा राष्ट्रिय जनमोर्चा कर्णाली प्रदेश समितिका अध्यक्ष पूर्णबहादुर शाही, राजमो प्रदेश सदस्य कटकबहादुर शाही, धर्मराज उपाध्याय र पदमसिंह कामी, अखिल नेपाल जनजाति सम्मेलनका पूर्व केन्द्रीय सदस्य पिनु थापा, राजमो सुर्खेत विष्णुबहादुर शाही, राजमो पञ्चपुरी गाउँ समितिका सदस्य शशिराम कँडेल र गोविन्द शाही, अखिल नेपाल युवक सङ्घघ सुर्खेतका चोहन मिदुनलगायतका नेताकार्यकर्ताको उपस्थिति रहेको थियो ।
कार्यक्रमस्थलमा रक्तिमका कलाकार टोलीद्वारा विभिन्न जनवादी गीतमा दर्जनौँ गीत तथा नृत्य प्रस्तुत गरेका थिए ।
सो अवसरमा जनभेटघाट, पर्चा वितरण, आर्थिक सङ्कलनलगायतका कार्यक्रम पनि सम्पन्न भएको आयोजक रक्तिमले जानकारी दिएको छ ।
