नेपालगञ्ज । नेकपा (मसाल) का पार्टीसदस्यसमेत रहनुभएका बाँके कोहलपुर क्षेक्रका अग्रज व्यत्तित्व ऋषिराम लामिछाने (कोमल) को निधन भएको छ ।
कोहलपुर नगरपालिका वडा नं. १ कौशिलानगर निवासी लामिछानेको शनिबार आफ्नै निवासमा ८१ वर्षको उमेरमा २०८१ वैशाख २८ गते शुक्रबार निधन भएको थियो ।
स्मृतिशेष लामिछानेको वैशाख २९ गते शनिबार अघैयाघाटमा दाहसंस्कार गरिएको छ ।
बुबा डण्डपाणि लामिछाने तथा आमा मनकुमारीको कोखबाट २००१ साल भदौ २७ गते कास्की ताक्राङमा जन्मनुभएका लामिछाने पाँच भाइमध्ये जेठो सन्तान हुनुहुन्थ्यो । उहाँकी पत्नी लीलामाया लामिछाने अखिल नेपाल महिला सङ्घकी पूर्व केन्द्रीय सदस्य हुनुहुन्छ । उहाँको परिवारमा तीन छोरा र दुई २ छोरी रहेका छन् ।
घाटमा श्रद्धाञ्जली सभा
आजै स्थानीय अघैयाघाटमा दाहसंस्कारअघि श्रद्धाञ्जली सभाको आयोजना गरिएको थियो ।
मसालका प्रतिनिधि तथा अखिल नेपाल युवक सङ्घका केन्द्रीय अध्यक्ष कृष्णराज पाण्डेले लामिछानेको पार्थिव शरीरमा कम्युनिस्ट पार्टीको झन्डा ओढाउनुभएको थियो ।
सभामा सङ्क्षिप्त श्रद्धाञ्जली मन्तव्य राख्दै उहाँले स्मृतिशेष लामिछानेको निधनले पार्टीले एउटा होनहार र असल कार्यकर्ता गुमाएको बताउँदै उहाँले लिएको बाटोमा हिड्न सके मात्र सच्चा श्रद्धाञ्जली हुने बताउनुभयो ।
अन्तिम श्रद्धाञ्जली दिन अखिल नेपाल किसान महासङ्घ (अप्फा) का महासचिव तुलसीराम सापकोटा, राष्ट्रिय जनमोर्चा लुम्बिनी प्रदेश समितिका सल्लाहकार वासुदेव पोख्रेल, राजमो लुम्बिनी प्रदेश समितिका सदस्य भीमप्रसाद देवकोटा, जातीय समता समाजका केन्द्रीय सदस्य मनबहादुर सुनार, नेकपा (माओवादी केन्द्र) का बद्रि पाण्डे, नेकपा (एमाले) लुम्बिनी प्रदेश समितिका सल्लाहकार टिपी न्यौपाने, नेपाली काङ्ग्रेसका भानुभक्त भट्टराईलगायत ठुलो सङ्ख्यामा राजनीतिक दलका नेता, कार्यकर्ता, समाजसेवी र सर्वसाधारण पुगेका थिए ।
श्रद्धाञ्जली सभाको सञ्चालन राजमो बाँकेका उपाध्यक्ष जगदीश ढकालले गर्नुभएको थियो ।
