काठमाडौं । नेपाल कम्युनिस्ट पार्टी (मसाल) ले अमेरिकी साम्राज्यवादको सहयोगमा इजरायलले प्यालेस्टाइनमाथि नरसंहार गरिरहेको भन्दै तीब्र विरोध गरेको छ ।

मसाल महामन्त्री मोहनविक्रम सिंहले शुक्रबार (२८ वैशाख) एक वक्तव्य प्रकाशित गरी प्यलेस्टाइनी नागरिकमाथि भैरहेको हत्या, दमन तथा देश निकालाको श्रृंखला रोक्न आह्वान गर्नुभएको छ ।

साथै, नेपाल सरकारलाई यस विषयमा धारणा राख्न र संसारभरीबाट प्यालेस्टाइनी जनताको मुक्तिका लागि आवाज उठाउन समेत मसालले आग्रह गरेको छ ।

यस्तो छ, वक्तव्य
प्यालेस्टाइनी जनतामाथि इजरायलले गरेको बर्बर नरसंहारका विरुद्ध अमरिकाका विद्यार्थीहरुले गरेको देशव्यापी आन्दोलनलाई ने.क.पा.(मसाल) ले हार्दिक स्वागत गर्दछ । वास्तवमा प्यालेस्टाइनका जनताले ७ दशकभन्दा बढी समयदेखि आफ्नो मातृभूमिको मुक्तिको लागि संघर्ष गर्दै आएका छन् । अमेरिकाको मदतमा प्यालेस्टाइनका लाखौँ जनतालाई त्यहाँबाट निष्कासित गरेर त्यहाँ इजरायल राज्यको स्थापना गरेदेखि नै प्यालेस्टाइनका जनताले आफ्नो देशको मुक्तिको लागि संघर्ष गर्दै आएका छन् । उनीहरूलाई दबाउन इजरायल सरकारले दशकौँदेखि प्यालेस्टाइनी जनतामाथि लगातार दमन गर्दै आएको छ ।

हाल गाजापट्टिमा करिब ३७,००० जनताको हत्या गरिएको छ, जसमा ठूलो संख्या महिला र बालबालिकाहरुको छ । त्यहाँ ठूलो संख्यामा घर, अस्पताल, विश्वविद्यालय समेत ध्वस्त गरिएका छन् । त्यहाँ ग्याँस, पानी, विजुली आदि समेतको आपूर्ति इजरायलबाट नै हुन्छ । इजरायलले वारम्वार ती सबैको आपूर्ति मात्र बन्द गरिदिने गरेको छैन, बारम्बार अन्य देशबाट आउने खाद्यन्न वा औषधी समेतको आपूर्तिमा नाकाबन्दी लगाइदिने गरेको छ । त्यसले गर्दा त्यहाँभोकमरीको स्थिति पनिउत्पन्नहुने गरेको छ ।

अमेरिकाले मध्य एसियामा आफ्नो प्रभुत्व कायम गर्नको लागि नै इजरायल राज्यको स्थापना गरेको थियो र अहिले पनि अमेरिकाको मदतमा नै इजरायल प्यालेस्टाइनी जनतालाई दबाउन सफल हुने गरेको छ । अहिले इजरायलले ठूलो पैमानामा प्यालेस्टाइनी जनताको नरसंहार गर्न सक्नुका पछाडि अमेरिकाको मदतले नै काम गरिरहेको छ । हाम्रो पार्टीले प्यालेस्टाइनी जनतामाथि इजरायलले गरिरहेको बर्बर अत्याचार वा नरसंहारको तीव्र शब्दमा भ्रत्र्सना गर्दछ ।

इजरायलको प्यालेस्टाइनी जनतामाथि भइरहेको त्यस प्रकारको अत्याचारका विरुद्ध विश्वप्यापी रूपमा नै विरोध वा प्रदर्शनहरू भइरहेका छन् । युरोपका विभिन्न देशमा पनि प्यालेस्टाइनी जनतामाथि भइरहेका त्यस प्रकारका अत्याचारका विरुद्ध प्रदर्शनहरू भएका छन् । त्यही सिलसिलामा अहिले अमेरिकामा पनि विद्यार्थीहरूद्वारा व्यापक रूपमा प्रदर्शनहरू भएका छन् । तर यो बताउँदा हामीलाई धेरै नै दुःख लागेर आउँछ कि प्यालेस्टाइनी जनतामाथि भएका अत्याचारहरूका विरुद्ध तथा उनीहरूको मुक्तिका पक्षमा नेपालमा अत्यन्त कम आवाज उठेको छ ।

निश्चय नै त्यसबारे राष्ट्रिय जनमोर्चाले देशका विभिन्न भागहरूमा सभा वा विरोध प्रदर्शनहरूको आयोजना गरेको थियो । ती कार्यक्रमहरूमा ने.क.पा.(मसाल)ले पनि ऐक्यबद्धता प्रकट गरेको थियो र त्यसबारे देशका अन्य कुनै पार्टीहरूले, यहाँसम्म कि वामपन्थी शक्तिहरूले पनि कुनै कार्यक्रमको आयोजना गरेको पाइएन । यो गम्भीर दुःख र अफ्सोचको कुरा हो ।

अब प्यालेस्टाइनी जनता र इजरायलको बिचको युद्ध त्यहाँको स्थानीय युद्ध रहन गएको छैन । त्यो युद्धमा खाडी देशका कैयौँ सशस्त्र समूहहरू र इरान समेत प्रत्यक्ष रूपले सामेल भएका छन् । संसारका कैयौँ महाशक्तिहरू रुस, चीन, अमेरिका समेत त्यो युद्धमा एक वा अर्को प्रकारले सामेल हुन थालेका छन् । भूमध्यसागर, लालसागर समेत त्यो युद्धका केन्द्र बन्न थालेका छन् । त्यसरी त्यो युद्धमा, एकातिर सम्पूर्ण मध्य एसिया मुछिने र अर्कातिर त्यसले विश्वयुद्धको पनि रूप लिने सम्भावना देखा पर्दै गइरहेको छ । यदि त्यस्तो भयो भने त्यसबाट सम्पूर्ण मानवजाति र विश्वशान्तिलाई समेत खतरा पुग्ने सम्भावना छ ।

प्यालेस्टाइन र इजरायलका विचमा चलिरहेको युद्धको त्यस प्रकारको गम्भीरतामाथि ध्यान दिँदै त्यहाँ स्थायी युद्धविराम गर्नको लागि विश्वभरी नै आवाज उठिरहेको छ । त्यस प्रकारको युद्धविरामको प्रस्तावलाई इजरायलले विरोध गरेको छ भने संयुक्त राष्ट्रसंघमा आएका त्यस प्रकारका प्रस्तावहरूलाई अमेरिकाले बारम्बार भिटो लाउने गरेको छ ।

अन्त्यमा हाम्रो पार्टीले प्यालेस्टाइनी जनताको मुक्ति आन्दोलनको पक्षमा तथा युद्धका विरुद्ध र शान्तिको पक्षमा आवाज उठाउनको लागि सम्पूर्ण न्याय र शान्तिप्रिय नेपाली जनता तथा राजनीतिक पार्टी, संगठन तथा संघसंस्थाहरू समेतसित अपील गर्दछ ।

२०८१ वैशाख २७ गते ।
मोहनविक्रम सिंह
महामन्त्री