टेकराज भुसाल, सन्धिखर्क ।
अर्घाखाँची जिल्लाको भूमिकास्थान नगरपालिका वडा नं ३ र ४ धारापानीमा लागेको आगो नियन्त्रण बाहिर रहेको छ।

शनिवार दिउँसो भूमिकास्थान–३ को रातामाता जंगलबाट लागेको आगो रातामाटा, जाबुनडाँडा, बाजाखर्क र भूमिकास्थान–४ को फलामखिल्ली लगायतका बस्तीमा पस्दा ३० घर, गोठ, केही पशुचौपाया र एउटा मोटरसाइकल जलेर नष्ट भएको छ ।

आगोबाट भूमिकास्थान–३ का राजु भुसालको घरगोठ, रिखिराम भुसालको घर, गंगाराम भुसालको गोठ, खुमप्रसाद भुसालको थारो, एउटा भैंसी घाइते, एउटा मरेको, डोल प्रसाद भुसालको गोठ, पूर्णप्रसाद भुसालको गोठ र एउटा मोटरसाइकल, विष्णु जिसीको पसल गर्ने खोका, रेशम परियारको घर, तिलक भुसालको थारे घर, पदम भुसालको गोठ, शान्ता बन्जाडेको गोठ, बेदुराम बिकको गोठ, मिना बिकको गोठ, निमबहादुर बिकको गोठ जलेको छ ।

यसैगरी बसन्ता मल्लको घर, गोठ, गंगाबहादुर बिकको गोठ, कृष्णकुमारी वलीको घर, गोठ र पशुचौपाया, रामजी भुसाल घर र गोठ, शोभाखर बन्जाडेको गोठ, दुर्गा बिक थारेघर, भुपलाल भुसालको गोठ र भैंसी, झविलाल भुसालको घर र गोठ, खिमप्रसाद भुसालको घर, ईश्वरी भुसालको गोठ र भूमिकास्थान–४ फलामखिल्लीको कामीडाँडाका भगवती थापाको १ घर र गोठ जलेर नष्ट भएको छ ।

हिजो दिउँसोदेखि नै आगो निभाउनका लागि एउटा दमकल, नेपाली सेना, सशस्त्र प्रहरी, नेपाल प्रहरी, जनप्रतिनिधि तथा स्थानीय प्रयासमा रहेपनि आगो अझैसम्म नियन्त्रणभन्दा बाहिर रहेको र आगोबाट लाखौंको क्षति भएको छ ।

आगो नियन्त्रणभन्दा बाहिर रहेकोले कति क्षति भयो भन्ने यकिन नभएको भूमिकास्थान नगरपालिकाका प्रमुख झविलाल थापाले बताउनुभयो ।