काठमाडौं । काठमाडौंको बूढानीलकण्ठ नगरपालिकाले स्टेसनरी सामग्री बेच्ने निजी विद्यालयबाट ती सामग्री जफथ गर्न सुरु गरेको छ । निर्देशन अटेर गरी विद्यार्थीलाई स्कुलबाटै स्टेसनरी सामान बेचेको भन्दै नगरपालिकाले विद्यालयमा छापा मार्न थालेको हो ।
आइतबार बूनपा–९ स्थित एकताबस्ती मण्डिखाटारमा रहेको लोयल्टी एकेडेमी, वडा नं १० कपनमा रहेको ड्याफोडिल बोर्डिङ स्कुललगायत केही विद्यालयमा नगरपालिकाको टिमले छापा मारेको छ ।
त्यसक्रममा लोयल्टी एकेडेमीबाट विद्यार्थीलाई बेच्न तयारी अवस्थामा राखेको १२ सय थान कापी बरामद गरेको नगरपालिककी शिक्षा अधिकृत अनिता खनालले जानकारी दिइन् ।
अधिकृत खनाललका अनुसार ड्याफोडिल स्कुलमासमेत विद्यार्थीलाई बेच्न ठिक्क पारेको शैक्षिक सामग्री फेला परेको छ । अनुगमन टोलीले ती सामान सिल गरी आफ्नो नियन्त्रणमा लिएको छ ।
यसअघि आइतबार नै बूढानीलकण्ठ क्षेत्रका स्टेसनरी व्यवसायीले नगरप्रमुख मिठाराम अधिकारीसँग भेट गरी विभिन्न विद्यालयहरूबाटै स्टेसनरी सामग्री बेचबिखन भइरहेकोप्रति ध्यानाकर्षण गराएका थिए ।
नेपाल पुस्तक तथा स्टेसनरी व्यवसायी महासंघको प्रतिनिधि मण्डलले नगरप्रमुखसमक्ष विद्यालयबाट स्टेसनरी सामग्री बिक्री गर्दा एकातिर स्टेसनरी व्यवसाय धराशायी बन्ने अवस्थामा पुगेको र अर्कोतर्फ अभिभावकले चर्को मूल्य तिर्नूपरिरहेको गुनासो गरेका थिए ।
‘स्कुलले नै कापी, किताब बेच्दा स्टेसनरी व्यवसाय धरासायी हुन थाल्यो’ महासंघ बागमती प्रदेश सचिव कृष्णप्रसाद न्यौपानेले भने, ‘विद्यार्थीले कम खर्चमा पाउने कापी, किताब चर्को मूल्य लिएर स्कुलबाटै किन्नुपर्ने बाध्यताका कारण अभिभावक मर्कामा परेका छन् । यो शोषण रोकिनुपर्छ ।’
जवाफमा नगरप्रमुख अधिकारीले व्यवसायीका माग जायज रहेको भन्दै नगर क्षेत्रका स्कुलले स्टेसनरी सामग्री बेचेको पाइएमा कारबाही गर्ने बताएका थिए ।
यसअघि नगरपालिकाले गत चैत २ गते विद्यालयहरुलाई सर्कुलर गरी स्टेसनरी सामग्री नबेच्न भनेको थियो ।
संस्थागत विद्यालय सञ्चालन निर्देशिका २०६९ बमोजिम विद्यालयले स्टेसनरी सामान बेचबिखन गर्न पाउँदैनन् ।
यस्तै, सर्वोच्च अदालतले समेत विद्यालयलाई शैक्षिक सामग्री बेच्न रोक लगाएको छ ।
