टेकराज भुसाल, सन्धिखर्क ।
अर्घाखाँची जिल्लाको भूमिकास्थान नगरपालिका–३ धारापानीका बाख्रापालक कृषकलाई प्रजनन्योग्य बोका र पाठी वितरण गरिएको छ ।
भेटेनरी अस्पताल तथा पशुसेवा विज्ञकेन्द्र अर्घाखाँचीको आर्थिक सहयोगमा २०८१ वैशाख २ गते आइतबार सानीपोखरी कृषि तथा पशुपालन कृषक समूहमा आबद्ध कृषकलाई प्रजनन्योग्य बोका र पाठी वितरण गरिएको हो ।
भेटेनरी अस्पताल तथा पशुसेवा विज्ञकेन्द्र अर्घाखाँचीका प्रमुख विष्णुप्रसाद पौडेल, भूमिकास्थान–३ का अध्यक्ष कृष्णप्रसाद बन्जाडे, प्रगति कृषक सहकारी संस्थाका अध्यक्ष भुवानन्द भुसाल, भेटेनरी अस्पताल तथा पशुसेवा विज्ञकेन्द्रका राधा पन्थी (पान्डे), भूमिकास्थान युवा सञ्जालका अध्यक्ष टेकराज भुसालले कृषकलाई ५८ ओटा प्रजनन्योग्य बाख्रा, दुईओटा बोका हस्तान्तरण गर्नुभएको थियो ।
सो अवसरमा बोल्दै भेटेनरी अस्पताल तथा पशुसेवा विज्ञकेन्द्र अर्घाखाँचीका प्रमुख विष्णुप्रसाद पौडेलले अनुदानमा दिइएको प्रजनन्योग्य बाख्रा तथा बोकाबाट किसानको जीवनस्तर माथि उठाउन टेवा पुग्ने विश्वास व्यक्त गर्दै बाख्रापालन सजिलो पेसा भएको र राम्रो आयआर्जन गरी अरूका अघि उदाहरणीय बन्न किसानलाई आग्रहसमेत गर्नुभयो ।
भूमिकास्थान–३ का अध्यक्ष कृष्णप्रसाद बन्जाडेले ३ नम्बर वडा बाख्रापालनका लागि उपयुक्त वातावरण भएको बताउँदै बाख्रापालन व्यवसाय अघि बढाउन आग्रह गर्नुभयो ।
प्रगति कृषक सहकारी संस्था भूमिकास्थान १ र २ का अध्यक्ष भुवानन्द भुसालले सहकारीमा आबद्ध कृषकले प्राप्त गरेका प्रजनन्योग्य बोका तथा पाठीलाइ राम्रोसँग पालनपोषण गरी आर्थिक लाभ लिन लागि अनुरोध गर्दै कृषकलाई केही समस्या परेमा साथ दिन तयार रहेको बताउनुभयो ।
कार्यक्रममा भूमिकास्थान नगरपालिकाका पशुप्राविधिक हुमाकान्त बन्जाडे, भूमिकास्थान युवा सञ्जालका संयोजक टेकराज भुसाल, भेटेनरी अस्पताल तथा पशुसेवा विज्ञकेन्द्रका कर्मचारी, स्थानीय सङ्घसंस्थाका अध्यक्ष, प्रतिनिधि तथा कृषकको उपस्थिति रहेको थियो ।
कार्यक्रम सानीपोखरी कृषि तथा पशुपालन कृषक समूहका अध्यक्ष बसन्ता पौडेलको अध्यक्षता र भेटेनरी अस्पताल तथा पशुसेवा विज्ञकेन्द्र अर्घाखाँचीका अधिकृत छैटौँ सुन्दरलाल विकको सहजीकरणमा सम्पन्न भएको थियो ।
