सन्तोष सुनार, सन्धिखर्क ।
अखिल नेपाल ट्रेड युनियन महासङ्घ (अन्टुक) जिल्ला समिति अर्घाखाँचीको आयोजनामा सदरमुकाम सन्धिखर्कमा विस २०८१ सालको भित्तेपात्रो विमोचन एवम् नयाँ वर्षको शुभकामना आदानप्रदान कार्यक्रम सम्पन्न भएको छ ।
अन्टुकका उपाध्यक्ष गोविन्द बिसीद्वारा २०८१ वैशाख १ गते शनिबार आयोजित कार्यक्रममा ब्यानर वाचन गर्दै सो कार्यक्रम सम्पन्न गर्नुभएको हो ।
कार्यक्रमलाई सम्बोधन गर्दै बिसीले संसारभरि विभिन्न क्षेत्रमा कार्य गरिरहनुभएका मजदुरको हकहितका लागि विभिन्न माध्यमबाट अत्यन्तै राम्रो भूमिका निर्वाह गर्दै आएको बताउनुभयो ।
अन्टुक विभिन्न सङ्गठनको छाता सङ्गठन रहेको बताउँदै उहाँले सूर्यको प्रकाश जस्तै हाम्रो जीवनमा उज्यालो ल्याउन कुनै शङ्का नभएको जानकारी गराउनुभयो ।
कार्यक्रममा विशिष्ट अतिथि अखिल नेपाल महिला सङ्घकी माहासचिव सकुन्तला राना हुनुहुन्थ्यो ।
कार्यक्रमलाई राष्ट्रिय जनमोर्चाका केन्द्रीय सदस्य सागर केसी, राजमो प्रदेश सदस्य तथा जिल्ला अध्यक्ष थम्मन केसी र अन्टुकका प्रदेश सदस्य रामजी भट्टराईले कार्यक्रममा सम्बोधन गर्नुभएको थियो ।
त्यस्तै, अतिथीहरूमा भूमिकास्थान नगरपालिकाका प्रमुख झविलाल थापा, महिला सङ्घकी जिल्ला सदस्य तथा वडासदस्य माधवा बेल्बासे, देउराली यातायत प्रालिका अध्यक्ष गोबिन्द बन्जाडे, अखिल नेपाल किसान महासङ्घ (अप्फा) का जिल्ला अध्यक्ष गणेश बन्जाडे, अर्घाखाँची उद्योग सङ्घका तुल्सिराम खनाल र प्रगतिशील पत्रकार सङ्घका प्रतिनिधि सन्तोष सुनारलगायतको उपस्थिति थियो ।
इन्द्रमणि भुसालको अध्यक्षता, उपाध्यक्ष उषा बस्नेत स्वागत मन्तव्य र गोपालप्रसाद भट्टराईको सञ्चालनमा उक्त कार्यक्रम सम्पन्न भएको थियो ।
