काठमाडौँ । हिन्दुमुस्लिम समुदाय दोहोरा भिडन्तमा उत्रिएपछि सुनसरीको भुटाहा बजार तनावग्रस्त बनेको छ ।
२०८० चैत २३ गते शुक्रबार विहानबाट अशान्त बनेको भुटाहको अवस्था नियन्त्रण बाहिर गएको हो ।
दिउँसो १ बजेपछि सुरु भएको तनाव दोहोरो झडपमा परिणत भएको छ । तनावग्रस्त क्षेत्रमा बाक्लो सुरक्षा तैनाथ भए पनि दुई पक्षको हुलका कारण सुरक्षाकर्मी पछि हट्नुपर्ने अवस्थाको सिर्जना भएको छ ।
प्रदर्शनकारीले गाउँपालिकाको कार्यालय, इलाका प्रशासन कार्यालय र प्रहरी पोस्टमा क्षति पु¥याएका छन् । सुनसरी प्रहरीले दिएको जानकारीअनुसार अहिलेसम्म ५१ राउन्ड बढी हवाई फायर भइसकेको छ ।
दुई जनालाई गोली लागेको प्रत्यक्षदर्शीले बताएका छन् । अश्रुग्याँस र हवाई फायर के कति भएको भन्ने विषय यकिन भइनसकेको जिल्ला प्रशासन कार्यालय सुनसरीले जनाएको छ ।
कामु प्रमुख जिल्ला अधिकारी वेदराज फुयालले निषेधाज्ञाका बाबजुद भिड नियन्त्रणमा आउन नसकेको बताएका छन् । अवस्था नियन्त्रणमा लिन हरसम्भव प्रयास भइरहेको उनले बताए ।
यसैबिच, अवस्था नियन्त्रणबाहिर जाने देखेपछि सुरक्षा समितिको आपतकालीन बैठक बसेको छ । दलीय प्रतिनिधिसहितको उपस्थितिमा प्रशासन कार्यालयमा बसेको बैठकले अनियन्त्रित बन्दै गएको भिडलाई संयमता अपनाउन पहल गरिदिन सरोकारवालासमक्ष आग्रह गरेको छ ।
कोशी प्रदेशका तीनओटै सुरक्षा निकायका डिआइजीसमेतको उपस्थितिमा इनरुवामा सम्पन्न बैठकले अवस्था थप नियन्त्रणबाहिर जाने देखिए सुरक्षाकर्मीले बलप्रयोग गर्न सक्ने चेतावनी दिएको छ ।
जारी तनाव र प्रदर्शन दक्षिणी भेग हुँदै आसपासका सहर बजारमा समेत बढ्दै गएको छ । दुई समुदायका प्रदर्शनकारी आपसमा भिडेपछि भुटाहा बजारसँगै गौतमपुर, देवानगञ्जलगायत दक्षिणी भेगका अधिकांश क्षेत्र तनावग्रस्त बनेको छ ।
यो समाचार तयार पार्दासम्म सुनसरी प्रशासनले हरिनगर गाउँपालिकाका सबै वडा र देवानगञ्जको १ र २ नम्बर वडालाई लक्षित गरी निषधाज्ञा जारी गरेको छ । आवश्यकताअनुसार दायरा बढाउने वा थप कडाइआदेश गर्न सक्ने जनाएको छ ।
भुटाहामा अघिल्लो दिन हिन्दु युवामाथि मुस्लिम युवा समूहले कुटपिट गरेका थियो । घाइते जीवन मेहता धरानमा उपचाररत छन् । उनको अवस्था सुधारोन्मुख रहेको बताइएको छ ।
उक्त कुटपिट घटना विषयलाई लिएर स्थानीय हिन्दु समूहले उक्त घटनाको विरोधमा आज बिहानैबाट प्रदर्शन चर्काएका थिए । मुस्लिम समूहका युवाको कुटपिटमा परेका हिन्दु युवाले मुस्लिम धर्मसँग सम्बन्धित उश्रृङ्खल अभिव्यक्ति दिएको भिडिओ सामाजिक सञ्जालमा भाइरल बनेको थियो । सोही कारण उनीमाथि आक्रमण भएको बुझिएको छ ।
घटना विषयमा हिन्दु र मुस्लिम दुवै पक्षले आफ्नो पक्षको अडान राख्दै आएका छन्, जसले आज दई समुदायबिच झडपको अवस्था निम्त्याएको हो । घटनामा बाहिरी जिल्लाबाट मानिस आउन प्रशासनले कडाई गरे पनि विरोधमा सामेल हुन आउनेको सङ्ख्या बढ्दै गएको छ ।
