काठमाडौं । उपप्रधान एवम् गृहमन्त्री रवि लामिछानेकी पत्नी निकिता पौडेल पनि सहकारीसम्बन्धी विवादमा तानिएकी छन् ।
निकिता निवर्तमान उपाध्यक्ष रहेको काठमाडौंको बिजुलीबजारस्थित साई स्वागत बचत तथा ऋण सहकारी संस्था र निकिता विरुद्ध काठमाडौं महानगरपालिकामा उजुरी आएपछि महानगरले छापा मारेको छ ।
महानगरका अनुसार बचतकर्ताले सञ्चालक समितिबाट रकम हिनामिना गरेको भन्दै बचत फिर्ता दिन महानगरमा उजुरी दिएका थिए । महानगर सहकारी विभागमा उपाध्यक्ष पौडेल जमानी बसेर ऋण दिएको मान्छे नै भागेको भन्दै उजुरी आएको थियो ।
अनुगमनमा संलग्न एक सदस्यका अनुसार महानगरको अनुगमन टोलीले सहकारी कार्यालयबाट सहकारीको सफ्टवेयर सिस्टम ल्याएको छ।
यस्तै, पछिल्लो साधारणसभाको उपस्थिति निर्णय सहित माइन्युट, सहकारीबाट ऋण लिने ऋणीको विवरण, बचतकर्ताको विवरण, धेरै ऋण लैजाने ऋणी, सञ्चालक समितिका सदस्यहरूको विवरण पनि टोलीले ल्याएको छ।
महानगरपालिकाले धेरै उजुरी आएका विभिन्न सहकारीहरूमा तीन दिनयता छापा मारी कागजपत्र जफत गरिरहेको एक अधिकारीले बताए।
महानगरपालिका अनुसार धेरै उजुरी आएका ४० सहकारीमध्ये साई स्वागत बचत तथा ऋण सहकारी पनि एक हो।
स्नोतका अनुसार निकिता सो संस्थामा पूर्वउपाध्यक्ष रहेपनि हाल आवद्ध छैनन् ।
महानगरले उजुरी परेका सहकारीहरुमा छापा मारी कागजपत्र ल्याएर अनुसन्धान गर्ने जनाएको छ ।
