काठमाडौं । बागमती प्रदेशमा दुईजना सांसद रहेको हाम्रो नेपाली पार्टी (हानेपा) मा भाँडभैलो मच्चिएको छ । सो पार्टीका सांसद सांसद शैलेन्द्रमान बज्राचार्य पार्टीलाई जानकारी नै नदिई बागमती सरकारको मन्त्री बनेपछि भाँडभैलो मच्चिएको हो ।
हानेपाले सत्ता गठबन्धनले आफ्ना सांसदको राजनीतिक अपहरण गरेको आरोप लगाएको छ। शुक्रबार विहान हेटौंडामा पत्रकार सम्मेलन गरी हानेपाका अध्यक्ष अनन्तराज घिमिरेले प्रदेशका सत्ता साझेदार दलले उनको राजनीतिक अपहरण गरेर मन्त्री बनाएको आरोप लगाए ।
‘पार्टीमा छलफल हुँदै गर्दा राजनीतिक अपहरण शैलीमा सरकारमा सहभागी गराइयो। बिहान ११ बजेदेखि उहाँ (शैलेन्द्रमान) हाम्रो सम्पर्कमा रहनुभएन’, अध्यक्ष घिमिरेले भने, ‘११ बजे अपहरणमा पर्नुभयो। साँझ सिधै मन्त्रीको शपथ ग्रहण गरेको समाचार आयो। राजनीतिक अपहरण गरेर मन्त्री बनाउँदैमा सरकारलाई विश्वासको मत दिइँदैन।’
यही चैत ३ र ४ गते बसेको पार्टीको केन्द्रीय समितिको बैठकले गरेको निर्णयविपरीत सांसद बज्राचार्य सररकारमा सहभागी भएको उल्लेख गर्दै अध्यक्ष घिमिरेले सरकारलाई विश्वासको मत दिए उनलाई पार्टीले कारबाही गर्ने चेतावनी दिएका छन्। बज्राचार्यले राजनीतिक बेइमानी गरेको आरोप उनले लगाए।
यता, प्रदेशको संस्कृति पर्यटन तथा सहकारी मन्त्रीमा नियुक्त बज्राचार्य भने कसैले अपहरण नगरेको बताउँछन्।
पत्रकार सम्मेलनमा हानेपाका अध्यक्ष घिमिरेलगायत नेताहरू
बागमती प्रदेश सभामा हानेपासँग दुई सिट छ। गत ४ मंसिर २०७९ को आम निर्वाचनमा काठमाडौँको प्रदेश सभा क्षेत्र नम्बर ८(१) मा शैलेन्द्रमान बज्राचार्य निर्वाचित भएका हुन् भने काठमाडौँकै सरिता खड्गी समानुपातिक सांसद निर्वाचित भएकी हुन्।
समानुपातिक सांसद खड्गी भने पार्टीकै निर्णयमा अडिग रहेको हानेपाले जनाएको छ ।
माओवादी केन्द्रका मुख्यमन्त्री शालिकराम जम्कट्टेलले प्रदेश सरकारको संकट टार्न बज्राचार्यलाई मन्त्री बनाएका हुन् ।
११० सदस्यीय बागमती प्रदेश सभामा सरकार गठनका लागि बहुमत पुर्याउन ५६ सांसदको साथ चाहिन्छ।
केन्द्रीय सत्ता गठबन्धनमा रहेका दलमध्ये बागमती प्रदेश सभामा नेकपा माओवादी केन्द्र, नेकपा एमाले र नेकपा एकीकृत समाजवादी मात्रैका सांसदले बहुमत पुग्दैनथ्यो।
हानेपाले साथ दिए गठबन्धन नेतृत्वको सरकार ढल्दैन ।
बागमतीमा एमालेका २७, माओवादीका २१, एकीकृत समाजवादीका ७ जना सांसद छन् भने हानेपाका २ सांसदले साथ दिए सरकारका पक्षमा ५७ सांसद पुग्छन् ।
