काठमाडौँ । मोहनविक्रम सिंहद्वारा लिखित ‘कामरेड जलजला’ उपन्यास आगामी वर्ष २०८१ को दशैँतिहारतिर प्रकाशन हुने दाबी गरिएको छ ।
नेकपा (मसाल) का महामन्त्रीसमेत रहनुभएका प्रगतिवादी साहित्यकार लेखक सिंहले २०८० चैत १५ गते सो जानकारी गराउनुभएको हो ।
मसालको तीन ऐतिहासिक अभियानमा व्यस्त हुनुपरेकाले वर्ष २०८० मा उक्त प्रकाशन हुन नसकेको जानकारी पनि उहाँले गराउनुभएको छ ।
उहाँले उपन्यासको अङ्ग्रेजी अनुवाद पनि सँगसँगै भइरहेको जानकारीसमेत गराउनुभएको छ ।
उहाँले युगदर्शनलाई पठाउनुभएको नोटमा भन्नुभएको छ – “कामेड जलजला उपन्यास प्रकाशन हुने सूचना धेरै पल्ट जारी गरिएको थियो । यो साल पनि त्यसको प्रकाशन हुने सम्भावना थियो तर ऐतिहासिक तीन अभियानको कार्यक्रम, जसभित्र लेनिन शताब्दी स्मृतिदिवस, पार्टीको हीरक जयन्ती तथा पार्टीको नवौँ महाधिवेशमा व्यस्त हुनुपरेकाले यो साल त्यो उपन्यासको प्रकाशन सम्भव भएन । अब अर्काे सालको दशैँतिहारसम्म त्यो उपन्यास प्रकाशन हुने छ ।
त्यो उपन्यासलाई अङ्ग्रेजीमा अनुवाद गर्ने काम पनि भइरहेको छ । त्यसका जम्मा ८० ओटा परिच्छेदहरूमध्ये अहिलेसम्म २० परिच्छेदको अनुवाद भइसकेको छ ।”
