काठमाडौँ । त्रिभुवन विश्वविद्यालयअन्तर्गतको परीक्षा नियन्त्रक कार्यालयले जनसङ्ख्या विषयतर्फ बिए प्रथम वर्षको उत्तरपुस्तिका हराएपछि अखिल (छैठौं) ले आपत्ति प्रकट गरेको छ ।
अध्यक्ष देवेन्द्र कुँवरको हस्ताक्षरमा २०८० चैत १५ गते प्रेसवक्तव्य जारी गर्दै सङ्गठनले आपत्ति प्रकट गरेको हो ।
प्रेसवक्तव्यमा उत्तरपुस्तिका हराएर चितवन र दाङमा पुन परीक्षा लिन थालिएकोमा आपत्ति प्रकट गर्दै पनिका बल्खु कार्यालयका तत्कालै सुधार गरी विद्यार्थीको जीवनसँग खेलवाड रोक्नुपर्ने बताइएको छ ।
यस्तो छ, प्रेसवक्तव्यको पूर्ण पाठ :
“त्रिभुवन विश्वविद्यालय परीक्षा नियन्त्रण कार्यालयले स्नातक तह प्रथम वर्षको जनसङ्ख्या विषयको उत्तरपुस्तिका हराएपछि पनिकाले पुनः परीक्षा लिन लागेको भन्ने खबरप्रति हाम्रो सङ्गठनको गम्भीर ध्यानाकर्षण भएको छ ।
२०८० वैशाख महिनामा सञ्चालित बीए प्रथम वर्षको परीक्षाअन्तर्गत ‘पीओपी–४२२’ विषयको उत्तरपुस्तिका पनिकाले हराएपछि चितवनको रत्ननगर सहिद स्मृति बहुमुखी क्याम्पस र देउखुरी बहुमुखी क्याम्पस दाङले चैत २१ गतेदेखि परीक्षा गर्ने भन्दै परीक्षा तालिका सार्वजनिक गरेका छन् ।
परीक्षा नियन्त्रण कार्यालय बल्खु अत्यन्तै अव्यवस्थित, भद्रगोल र विद्यार्थीलाई दुःख दिने कार्यालयको रूपमा स्थापित हुँदै गएको छ र त्यहाँ यस प्रकारका गम्भीर घटना बारम्बार दोहोरिने गरेका छन् । हामीले टियु र पनिकालाई आफ्नो कार्यालयमा तुरुन्त सुधार गरी व्यवस्थित गर्न र विद्यार्थीको जीवनसँग खेलवाड नगर्न हार्दिक अनुरोध गर्दछौँ ।”
