काठमाडौँ । निजी विद्यालयले शैक्षिक सामग्री विद्यालय हाताभित्रबाट विक्री गरे कानुनी कारबाही गर्न सरोकारवालाले निर्देशन दिएका छन् ।
बुढानीलकण्ठ नगरपालिकाले पालिकाभित्रका निजी विद्यालयलाई निर्देशन जारी गर्दै कानुन विपरीत गए कानुनी कारबाही गर्ने चेतावनी दिएको हो ।
पछिल्लोपटक नगरपालिकाको तर्फबाट उपसचिव ललितविक्रम सिंहले २०८० चैत २ गते पुनः निर्देशन जारी गरेका थिए ।
निर्देशनको तेस्रो बुँदामा कक्षा १ मा भर्ना शुल्क लिइसकेपछि सोही विद्यार्थीबाट भर्ना शुल्क नलिन, विद्यालय हाता वा कुनै पसलबाट विद्यार्थी पोशाक किन्न बाध्य नपार्न भनिएको छ । यसअघि नै नगरपालिकाले बेग्लै निर्देशन जारी गरेर पुस्तक, कपी तथा अन्य शैक्षिक सामग्री विद्यालयले तोकेको स्थानबाट किन्न बाध्य नपार्न निर्देशन गरिसकेको जनाएको छ ।
पालिकाले पाठ्यपुस्तकको विवरण प्रकाशन गृहसमेत खुलाई विद्यालयको वेबसाइट वा सूचनापाटीमा प्रकाशन गर्ने र सोही विवरण पालिकाको शिक्षा शाखामा बुझाउन पनि भनेको छ ।
त्यस्तै, पालिकाले छात्तवृत्तिको सम्बन्धमा पनि आवश्यक निर्देशन दिनुका साथै प्रत्येक शुक्रबार नियमित अतिरिक्त क्रियालकलाप आयोजना गर्ने, आवासीय विद्यालयमा अध्ययनरत बालबालिकाको पूर्ण सुरक्षा प्रबन्ध गर्नुपर्ने, नियमित सामाजिक, मनोवैज्ञानिक परामर्श प्रदान गर्ने, निर्माणात्मक मूल्याङ्कन कार्यान्वयन गर्ने, बालबालिकालाई विद्यालयमा कुनै पनि प्रकारको शारीरिक, मानसिक, साङ्केतिक दण्ड नदिन पनि निर्देशन दिएको छ ।
काठमाडौँका निजी स्कुलले शैक्षिक सामग्री खरिद, छात्रवृत्ति र विभिन्न शुल्कबारे मनोमानी गरेपछि काठमाडौँ महानगरपालिका र अन्य पालिकाले पनि यस्तै खालका निर्देशन जारी गरेका हुन् । त्यस क्रममा चैत ७ गते काठमाडौँ महानगरपालिका र टोखा नगरपालिकाले पनि यस्तै निर्देशन जारी गरिसकेका छन् ।
यता, शिक्षा, विज्ञान तथा प्रविधि मन्त्रालयले चैत १२ गते दश बुँदे परिपत्र जारी गर्दै भर्ना, मासिक शुल्कलगायतका विभिन्न शुल्क नलिने निर्देशन दिइसकेको छ ।
प्रशासनले संस्थागत विद्यालय सञ्चालन निर्देशिका–२०६९, सर्वोच्च अदालतका विभिन्न मितिका फैसला, अनिवार्य तथा निःशुल्क शिक्षा ऐन–२०७५ र त्यसको नियमावली, स्थानीय सरकार सञ्चालन ऐन–२०७४ लगायतका ऐननियममाथि आधारित रहेर यस खालको निर्देशन जारी गरेको स्मरण गराएको छ ।
