काठमाडौँ । नेपाली काङ्ग्रेसले सहकारी ठगीमा मुछिएका गृहमन्त्री रवि लामिछानेको सम्बन्धमा संसद् अवरुद्ध गर्ने सङ्केत दिएको छ ।
२०८० फागुन २४ गते बिहीबार प्रतिनिधि सभामा सम्बोधन गर्दै नेपाली काङ्ग्रेसका संसदीय दलका सचेतक रमेश लेखकले यस्तो सङ्केत दिएका हुन् ।
‘यो सदनमा एउटा कुरा भएको छ । कुनै मन्त्रीमाथि अनुसन्धान प्रारम्भ भयो । कुनै मन्त्रीमाथि कुनै ठाउँबाट प्रश्न उठ्यो भने त्यो मन्त्रीले राजीनामा गर्नुपर्छ भनेर सदन अवरुद्ध भएको छ’ उनले भने– ‘त्यो बालकुमारी घटनाको बारेमा होस् या अरू घटनाका बारेमा । अब नियुक्त भएर आउनुभएका मन्त्रीहरू कुनै पनि ठाउँबाट कुनै पनि किसिमको अनुसन्धानको दायराभित्र नपरेका होलान् भन्ने आशा गरेको छु ।’
लेखकले उक्त कुराप्रति इङ्गित गर्दै लामिछानेलाई उपप्रधान तथा गृहमन्त्री बनाएको विषयमा जवाफ मागेका थिए । साथै लेखकले कुनै मन्त्रीमाथि अनुसन्धान हुँदा वा प्रश्न उठ्दा राजीनामा दिनुपर्ने भन्दै संसद् अवरुद्ध हुने गरेको स्मरण गराए ।
यसअघि बालकुमारी घटनामा जोडिएका तत्कालीन भौतिक पूर्वाधारमन्त्री प्रकाश ज्वाला, टेरामेक्स प्रकरणमा जोडिएका निवर्तमान स्वास्थ्यमन्त्री मोहन बस्नेत, रामग्राम प्रकरणमा जोडिएका तत्कालीन पर्यटनमन्त्री सुदन किराँतीको राजीनामा गर्दै एमालेले संसद् अवरुद्ध गरेको थियो ।
विवादित मन्त्रीको राजीनामा माग्दै संसद् अवरुद्ध गर्नेमा रास्वपा र राप्रपा पनि एमालेको साथमा थिए । बुधबार गृहमन्त्रालयको जिम्मेवारी सम्हालेका लामिछानेको विषयलाई काङ्ग्रेसले मुद्दा बनाउने सङ्केत गरेको छ ।
काङ्ग्रेसका एक पदाधिकारीले पनि राज्यको निकायबाट अनुसन्धानको दायरामा रहेका व्यक्तिलाई मन्त्री बनाइएको विषयलाई काङ्ग्रेसले गम्भीर रूपमा लिएको बताएका छन् ।
सरकारसँग जवाफ दिन माग
नेपाली काङ्ग्रेसले उपप्रधान तथा गृहमन्त्री रवि लामिछानेको नियुक्तबारे प्रधानमन्त्री पुष्पकमल दाहाल प्रचण्डसँग जवाफ मागेको छ ।
प्रमुख सचेतक लेखकले अनुसन्धानको दायरामा रहेका मन्त्रीबारे प्रधानमन्त्रीले जवाफ दिनुपर्ने बताएका हुन् ।
‘नियुक्त भएर आउनुभएका मन्त्रीहरू कुनै पनि ठाउँबाट कुनै पनि किसिमको अनुसन्धानको दायराभित्र नपरेका होलान् भन्ने आशा गरेको छु’ उनले भने– ‘यदि परेका छन् भने त्यसपछि सदन के हुन्छ भन्ने कुराको जवाफ पनि प्रधानमन्त्रीले दिँदा राम्रो हुन्छ भन्ने मेरो आग्रह छ ।’
राष्ट्रिय स्वतन्त्र पार्टीका सभापतिसमेत रहेका गृहमन्त्री लामिछानेमाथि सहकारी ठगीको आरोपमा प्रहरीको केन्द्रीय अनुसन्धान ब्युरो अनुसन्धान गरिरहेको छ । उनीबारे राहदानी दुरुपयोगमा सर्वोच्च अदालतको संवैधानिक इजलासमा मुद्दा विचाराधीन छ । सँगै प्रधानमन्त्री कार्यालय मातहत रहेको सम्पत्ति शुद्धीकरण विभागले पनि लामिछाने विरुद्ध सम्पत्ति शुद्धीकरणमा समेत छानबिन गरिरहेको छ । (रातो पाटी डट कम)
