नेपालगञ्ज । एक सय चौधौँ अन्तर्राष्ट्रिय श्रमिक महिला दिवसको अवसरमा बाँकेमा प्रशिक्षण कार्यक्रम सम्पन्न भएको छ ।
अखिल नेपाल महिला सङ्घ बाँकेको आयोजनामा २०८० फागुन २३ गते कोहलपुरमा उक्त कार्यक्रम सम्पन्न भएको हो ।
राष्ट्रिय जनमोर्चा लुम्बिनी प्रदेश समितिका अध्यक्ष बोमबहादुर खत्रीको प्रमुख आतिथ्यमा सम्पन्न उक्त कार्यक्रममा ८ मार्चसँग सम्बन्धित विषयमा चर्चा गर्नुभएको थियो ।
सो अवसरमा उहाँले अन्तर्राष्ट्रिय महिला आन्दोलनमा महिलाहरूको उल्लेखनीय योगदान रहेको धारणा पनि राख्नुभएको थियो ।
त्यस्तै, नेपालको राष्ट्रियता गम्भीर मोडमा रहेको उल्लेख गर्दै नेता खत्रीले नेपाली जनताले त्यसको विरुद्धमा सशक्त सङ्घर्ष गर्नुपर्ने आवश्यकतासमेत औल्याउनुभयो ।
विशिष्ट अतिथि महिला सङ्घकी केन्द्रीय सदस्य बालकुमारी आचार्यले कार्यक्रमलाई सम्बोधन गर्दै महिला मुक्ति आन्दोलनलाई निरन्तर अगाडि बढाउनुपर्ने आवश्यकतामा जोड दिनुभएको थियो ।
कार्यक्रममा अखिल नेपाल किसान महासङ्घ (अप्फा) का महासचिव तुलसी सापकोटा, अखिल नेपाल युवक सङ्घका अध्यक्ष कृष्णराज पाण्डे, जातीय समता समाजका केन्द्रीय सदस्य मनबहादुर सुनार, राजमो बाँकेका उपाध्यक्ष जगदीश ढकाल, महिला सङ्घकी पूर्व केन्द्रीय सदस्य लीलामाया लामिछानेलगायतले मन्तव्य राख्नुभएको थियो ।
महिला सङ्घकी जिल्ला अध्यक्ष पूर्णकला भण्डारीको अध्यक्षता तथा सचिव कल्पना पौडेल ‘जिज्ञासु’ को सञ्चालनमा अघि बढेको उक्त कार्यक्रममा उपस्थित सहभागीलाई उपाध्यक्ष पार्वती कार्कीले स्वागत गर्नुभएको थियो ।
कार्यक्रममा बसाइँ सरी चितवन जानुभएकी महिला सङ्घकी केन्द्रीय सदस्य बालकुमारी आचार्यलाई बाँकेमा उहाँको योगदानको कदर गर्दै प्रमुख अतिथि खत्रीको हातबाट सम्मान तथा बिदाइ गरिएको थियो ।
