शङ्करप्रसाद पोख्रेल, बुटवल ।
रुपन्देहीस्थित देवदह मेडिकल कलेज एन्ड रिसर्च इन्स्टिच्युटले बुटवलको कान्ति माविमा नि:शुल्क स्वास्थ्य शिविर सम्पन्न गरेको छ ।
“देवदह मेडिकल जाऔँ, स्वास्थ्य परीक्षण गराऔँ” मूल नाराका साथ २०८० फागुन १९ गते शनिबार उक्त शिविर सम्पन्न भएको हो ।
बुटवल उपमहानगर पालिका मेयर खेलराज पाण्डेले उद्घाटन गर्नुभएको शिविरको उद्घाटन कार्यक्रममा स्वागत कान्ति माविका प्रधानाध्यापक गोविन्द ज्ञवालीले तथा सञ्चालन कार्यक्रम संयोजक हीरालाल धामीले गर्नुभएको थियो ।
शिविरमा एक हजार जनाजतिको विभिन्न रोगको जाँच गरिएको कलेजका प्रमुख प्रशासकीय अधिकृत खडक जिरेलले जानकारी दिनुभयो ।
उहाँका अनुसार जनरल मेडिसिन, मुटु, नाक, कान, घाँटी, जनरल सर्जरी, छाला, कपाल तथा यौनरोग, हाडजोर्नी तथा नशा, फिजियोथेरापी, दन्तरोग, आँखा जाँच, बालरोग, प्रसूति सेवाअन्तर्गत विभिन्न स्वास्थ्य समस्याको जाँच गरिएको थियो । सोमध्ये कैयौँ बिरामीलाई कलेजमा पुन: बोलाइएको पनि जिरेलले जानकारी दिनुभयो ।
शिविरलाई सगरमाथा लुम्बिनी इन्स्योरेन्स, बुटवल उद्योग वाणिज्य सङ्घ, नेपाल अर्बुद रोग निवारण संस्था र बुटवल उपमहानगरपालिका वडा नं. ४ ले सहयोग गरेका थिए ।
