काठमाडौं । कोरोना भाइरसले निम्त्याएको विपद्को समयमा ज्वरो नाप्ने ‘थर्मल गन’ मा कालोबजारी गरेको आरोपमा शंकर ग्रुपका सुलभ अग्रवाल पक्राउ परेका छन् ।
थर्मल गनमा कालो बजारी गरेको सुराँक पाएपछि महानगरीय अपराध महाशाखाबाट खटिएको प्रहरी टोलीले ग्राहक बनेरउनलाई मंगलबार दिउँसो नक्सालस्थित कार्यालयबाट पक्राउ गरेको हो । करिब पाँच हजार रुपैयाँ पर्ने ‘थर्मल गन’ लाई उनले १६ हजार रुपैयाँसम्म बिक्री गरेको प्रहरीले जनाएको छ । ग्राहक बनेर डिल गरेको प्रहरीले उनीसँग ६७ वटा थर्मल गन बरामद गरेको छ ।
अचम्मको कुरा त के छ भने अग्रवालले कूटनीतिक नियोगको प्रतिनिधि भएको आडमा कालोबजारी गर्ने गरेका थिए । उनी किर्गिस्तानका लागि नेपालका अवैतनिक महावाणिज्यदूत हुन् । सोही आधारमा उनले निलो नम्बर प्लेटको गाडीको दुरुपयोग गरेका हुन् ।
प्रहरीका अनुसार उनले कूटनीतिक नियोगले प्रयोग गर्ने निलो नम्बर प्लेटको गाडी दुरुपयोग गरी ज्वरो नाप्ने थर्मल गनको कालोबजारी गर्दै आएका थिए ।
उनी नेपालमा कतिपय ठुला उद्योगका मालिक हुन् । उनी युनियन लाइफ इन्स्योरेन्सका अध्यक्ष तथा जगदम्बा स्टिलका सञ्चालकसमेत हुन् ।
प्रहरीका अनुसार उनले शनिबार मात्रै चीनको ग्वान्जाओ सहरबाट सात टन स्वास्थ्य सामग्री नेपाल ल्याएका थिए । सोही सामग्री बजार मूल्यभन्दा अत्यधिक महँगोमा बिक्री गरेको सूचनापछि प्रहरीले अनुसन्धान थालेको थियो । सामान किन्न प्रहरी १० लाख रुपैयाँ लिएर गएको थियो ।
प्रहरीले उनलाई कूटनीतिक नियोगको २०९ सी सी १ नम्बरको गाडीसहित नियन्त्रणमा लिएको हो। उनीमाथि कालोबजारी ऐन अनुसार कारबाही गरिने प्रहरीले जनाएको छ ।
