काठमाडौँ । सुनसरीको हरिनगर गाउँपालिका अध्यक्ष गफार अन्सारीले सीमामा भारतीय एसएसबीको ज्यादती बढेको भन्दै नेपाली पक्षले सोच्ने बेला आएको बताएका छन् ।
स्थानीयको धारणा बुझ्न पैदल यात्रामा निस्केको जिल्ला सुरक्षा समिति सुनसरीको टोली समक्ष सीमा अध्यक्ष अन्सारीले एसएसबीको ज्यादतीबारे बताएका हुन् ।
एसएसबीले नेपाली भूमिमा खाल्डो पारिदिने, टहरा निर्माण गर्ने, नेपालीलाई अनाहकमा दु:ख दिने जस्ता काम गर्दै आएको अन्सारीले बताए ।
सीमामा एसएसबीको उपस्थितिको विषयमै प्रश्न उठाएका अन्सारीले भारतले लागुऔषध खुला रुपमा नेपाल भित्रन दिएर बालबालिकाको भविष्य अन्यौल बनाउने जस्ता कार्य गरिरहेको आरोप समेत लगाए । उनले एसएसबीले चोरी तस्करी नियन्त्रणमा समेत नेपाली पक्षलाई सघाउ नगरेको भन्दै सोबारे माथिल्लो तहमै आवाज उठाउन ढिला गर्न नहुने धारणा राखे । स्थानीय अताबुल
अन्सारी समेतले एसएसबीको ज्यादती बढेको देख्दा नेपाली भूमि नेपालको नभई भारतकै हो की भन्ने आभास हुन थालेको बताए । उनले नेपाल सरकारले सो विषयमा ठोस कदम चाल्नुपर्ने बताए ।
पूर्वी नेपालको भारतसँग सीमा जोडिएको भेगमा बसोवास गर्दै आएका नेपालीले भारतीय सुरक्षा बल एसएसबीको ज्यादती बढ्दै गएको गुनासो गरेका छन् ।
सुनसरीका प्रमुख जिल्ला अधिकारी जयनारायण आचार्य सहितको टोलीमा रहेका सुरक्षा निकायका प्रमुखसमक्ष आफ्ना गुनासा राख्ने क्रममा सीमाका नेपालीहरूले एसएसबीको ज्यादती बारेको जानकारी गराए ।
सीमा क्षेत्रमा एसएसबीले नेपालीलाई गर्ने व्यवहार रुखो र अभद्र प्रकृतिको रहेको नेपाली भूमितर्फका बासिन्दाको भोगाई छ ।
उनीहरुले एसएसबीले नेपालीलाई ससाना कुरामा भाटा हान्ने, कुटपिट गर्ने र अनाहकमा पक्राउ गरी दु:ख दिने जस्ता कार्य गर्दै आएको नेपाली सुरक्षा निकायसमक्ष दुखेसो पोखेका छन् ।
कोशी प्रदेशका नेपाल प्रहरी र सशस्त्र प्रहरीका डिआइजीसमेतको उपस्थितिका बिच भारतीय सीमा सुरक्षा बल (एसएसबी) को कार्य शैलीको आलोचना गरेका स्थानीयले काउण्टर पार्टको बैठकमा सो विषय उठान गर्न मागसमेत गरेका छन् ।
सुनसरीमा ६२ किलोमिटर क्षेत्र भारतसँग सीमा जोडिएको छ । सीमा सुरक्षामा दुवै देशका सुरक्षाकर्मीको तैनाथी रहँदै आएको छ यद्यपि सीमामा रातदिनको सुरक्षा तैनाथीका बाबजुत चोरी तस्करी भने रोकिन नसकेको स्थानीयको भनाइ छ ।
सीमा क्षेत्रमा स्थानीयको धारणा र दशगजा क्षेत्रको अवस्था बुझ्न तीन दिने पैदल यात्रामा निस्केका प्रजिअ जयनायारण आचार्यले स्थानीयका प्रत्यक्ष गुनासा र समस्या सम्बोधनका सवालमा सरकारको ध्यानाकर्षण गराइने बताए ।
