जुमान सिंह केसी, प्युठान ।
रसिया–युक्रेन युद्धको २ वर्ष पूरा भएको छ । युद्धले दुई वर्ष पार गरेको त्रासदीपूर्ण अवस्थाविरुद्ध नेकपा (मसाल) र राष्ट्रिय जनमोर्चाले शनिबार (फागुन १२ गते) देशका विभिन्न स्थानमा विरोध प्रदर्शन गरेका छन् ।
यसैक्रममा साम्राज्यवादी युद्ध र नरसंहारविरुद्ध राष्ट्रिय जनमोर्चा, प्युठानले खलंगामा विरोध प्रदर्शन गरेको छ ।
‘विश्व शान्ति कायम गर, युद्ध पिपासु साम्राज्यवादी लडाईं बन्द गर’ भन्ने नारासहित राजमोले खलंगा पार्टी चोकमा कोणसभा गरेको हो।
कार्यक्रमलाई सम्बोधन गर्दै राष्ट्रिय जनमोर्चा लुम्बिनी प्रदेश अध्यक्ष बोमबहादुर खत्रीले साम्राज्यवादी मुलुकहरू हत्या हिंसा निम्त्याउने कार्यमा अग्रसर रहने गरेको बताउनु भयो ।
अमेरिकी साम्राज्यवादको नाङ्गो हस्तक्षेप बढ्दै गइरहेकोप्रति लक्षित गर्दै यसप्रकारका अमानवीय कार्य तत्काल रोकी शान्तिपूर्ण वातावरण कायम गर्न उहाँले आग्रह गर्नु भयो ।
फासिवाद तथा साम्राज्यवाद विरोधी संयुक्त मोर्चाका युवा उपाध्यक्ष सुवाश जिसिले एकापट्टि अमेरिका र नाटोको समर्थनमा साम्राज्यवादी मुलुक युक्रेन र अर्कोतिर रसियाबीचमा जारी युद्धमा दशौँ हजार सर्वसाधारणको हत्या भएको भन्दै अमेरिकाले विश्वलाई मानव अधिकारको पाठ पढाउने तर अन्य मुलुकमाथि युद्ध अपराध अपराध गर्ने गरेको बताउनुभयो ।
‘हामी विश्व शान्तिको कामना गर्दछौं र फासिवादी तथा साम्राज्यवादीहरूलाई युद्ध बन्द गर्न आव्हान गर्दछौं’ उहाँको भनाइ थियो ।
कार्यक्रममा राजमोका नेताकार्यकर्ताहरूको उल्लेखनीय सहभागिता रहेको थियो।
नाराजुलुस सहित विरोध प्रदर्शन गरिएको कार्यक्रमको सञ्चालन राजमो प्युठानका सचिव केशवराज आचार्यले गर्नु भएको थियो ।
