सुर्खेत । सुर्खेतको वीरेन्द्रनगर नगरपालिका–११ स्थित नेपाल राष्ट्रिय चन्द्रगंगा माध्यामिक विद्यालयकी शिक्षिका चेतना भण्डारीले एक विद्यार्थीलाई निर्घात कुटपिट गरेकी छन् ।
कक्षा ५ मा अध्ययनरत ११ वर्षीय छात्र ललित रेग्मी शिक्षिकाबाट कुटिएका हुन् ।
अंग्रेजी विषय पढाउने शिक्षिका भण्डारीले कक्षामा हल्ला गरेको भन्दै कुटपिट गरेको पीडित बालकले बताए। शिक्षिकाको कुटाईबाट बालकको पाखुरामा निल डाम छन्।
शिक्षिकाले कुटपिट गरेपछि अन्य शिक्षकहरूले भने बालक विद्यालयमा लडेर चोटपटक लागेको भन्दै घरै पुर्याएका थिए। शिक्षकहरु फर्केपछि बालकले आफूलाई मिसले कुटेको बताएका थिए ।
बालकलाई कुटपिट गर्ने शिक्षिका चेतना भण्डारीले आफूले कुटपिट गरेको स्वीकार गरेकी छन्।
घटना बाहिरिएपछि विद्यालयका प्रधानाध्यापक र अभिवावकसँग बसेर गरिएको छलफलमा शिक्षिका भण्डारीले गल्ती स्वीकार गरेकी हुन्।
प्रधानाध्यापक नेत्रमणि चालिसेले बालकलाई कुटपिट गरिएको कुरा सामान्य भएको भन्दै विद्यालय प्रशासनले अभिभावकसँग छलफल गरेर मिलाइसकेको दाबी गरे ।
