कृष्णनगर (कपिलवस्तु) । कपिलवस्तुको एउटा विद्यालयका विद्यार्थी एकाएक बेहोस हुन थालेपछि दुई दिनका लागि विद्यालय बन्द गरिएको छ ।
जिल्लाको शिवराज नगरपालिका–१ शिवपुरमा रहेको नेपाल आदर्श उच्च माध्यमिक विद्यालयका विद्यार्थी बेहोस हुन थालेपछि विद्यालय बन्द गरिएको हो ।
शिवराज नगरपालिकाका शिक्षा शाखा प्रमुख दिनेश चौधरीका अनुसार पठनपाठनकै समयमा केही दिनयता बेहोस हुने, चिच्च्याउने, रुनेलगायत समस्या देखिन थालेपछि विद्यालय बन्द गरिएको हो ।
विद्यार्थीको स्वास्थ्य अवस्थालाई दृष्टिगत गरी विद्यालय बन्द गरेको विद्यालयका प्रधानाध्यापक मुक्तिनाथ पोख्रेलले बताउनुभयो । फागु ९ गते बुधबार मात्र १० जनाभन्दा धेरै छात्रामा त्यस्तो समस्या देखिएपछि चिकित्सकको सल्लाहमा आइतबारसम्मका लागि विद्यालय बन्द गरिएको प्रधानाध्यापक पोखरेलले बताउनुभयो ।
विद्यालयमा समस्या देखिएपछि मनोविश्षेलकसँग परामर्श गरिएको नगरप्रमुख अजय थापाले बताउनुभयो ।
केही बेर बेहोस हुने, कराउने गरेपछि आफैँ ठिक हुने गरेको बताइएको छ । केही समयपछि फेरि अरू विद्यार्थीलाई पनि यस्तो समस्या देखिएपछि विद्यालयको पठनपाठन बन्द भएको हो । केही समयअघि सरस्वती आधारभूत विद्यालयमा पनि यस्तै समस्या भएको थियो ।
छात्रामा देखिएको समस्या मास हिस्टेरिया भएको चिकित्सक बताउँछन् । छात्रामा देखिएको समस्या मास हिस्टेरिया भएकाले केही दिन विद्यालय बन्द गरेर सम्पर्कविच्छेद गरेमा समस्या आफैँ समाधान हुने मनोविश्षेलकको दाबी छ । (रासस)
