काठमाडौं । विश्व शिक्षक महासंघ नेपाल च्याप्टरका नवनिर्वाचित अध्यक्ष सानोभाइ कार्कीले यो विषय आफ्ना लागि गौरवसँगै थप जिम्मेवारी भएको बताउनुभएको छ ।
समाजवादी शिक्षकहरुको अन्तर्राष्ट्रिय संगठन ‘वर्ल्डफेडरेसन अफ टिचर्स युनियन्स (डब्लुएफटीयू–एफआईएसई) को मंगलबार (८ फागुन) भएको पहिलो भेलाले कार्कीलाई नेपाल च्याप्टरको अध्यक्ष निर्वाचित गरेको हो ।
नेपाल च्याप्टरको संस्थापक अध्यक्ष बनेपछि युगदर्शनसँग कुरा गर्दै कार्कीले आफूलाई थप जिम्मेवारी बढेको महसुस भएको बताउनुभयो । नेपालमा सक्रिय शिक्षक संगठनहरूले विश्वास गरेर अखिल नेपाल शिक्षक संघलाई यो जिम्मेवारी सुम्पनु गौरवको विषय भएको कार्कीले बताउनुभयो ।
मकवानपुरको थाहा नगरपालिकास्थित जनकल्याण माध्यमिक विद्यालयका प्रधानाध्यापक रहेका कार्की अखिल नेपाल शिक्षक संघका केन्द्रीय अध्यक्ष हुनुहुन्छ ।
‘डब्लुएफटीयू–एफआईएसई विश्व शिक्षक महासंघको नेपाल च्याप्टर हो । यसमा विभिन्न वामपन्थी विचारधाराका शिक्षक संघ संगठनहरू आवद्ध छौँ’ कार्कीले भन्नुभयो, ‘अध्यक्षको जिम्मेवारीले संगठनको गौरवबोध सँगै व्यक्तिगत रुपमा पनि थप जिम्मेवारी बढेको महसुस गरेको छु ।’
उहाँले आफूलाई विश्वास गरेर यस्तो महत्त्वपूर्ण जिम्मेवारी सुम्पने शिक्षक संघ संगठनहरूलाई धन्यवाद ज्ञापन गर्नुभएको छ ।
शिक्षक संगठनहरुको अन्तर्राष्ट्रिय संगठनको नेपाल च्याप्टरमा अखिल नेपाल शिक्षक संघ, एकीकृत अखिल नेपाल शिक्षक संगठन, अखिल नेपाल शिक्षक संगठन, अखिल नेपाल राष्ट्रिय शिक्षक संगठन र माध्यमिक विद्यालय शिक्षक युनियन गरी पाँचवटा संगठन सामेल छन् ।
शिक्षकहरुको हरेक संगठनबाट अध्यक्ष, महासचिव र महिला प्रतिनिधि एक जनागरी राष्ट्रिय समिति बन्ने विधि रहेको कार्कीले जानकारी दिनुभयो ।
उहाँका अनुसार विश्व शिक्षक महासंघमा विश्वभरका १३२ देशका शिक्षक संगठनहरु सामेल छन् । यो संगठनको आवद्धता विश्व मजदुर संगठन (वर्ल्ड फेडरेसन अफ ट्रेड युनियन) सँग छ ।
यो संगठनले विश्वभरीका श्रमजीवि शिक्षकहरुको पेशागत हकहितसँगै समाजवादी शिक्षकहरूलाई ध्रुविकृत गर्ने लक्ष्य लिएको छ ।
यस्तो छ विश्व शिक्षक महासंघको नेपाल च्याप्टरको अवधारणा पत्र
